साउन २७, काठमाडौं । हिजो र आज केही सुस्त रहेको मनसुन भोलि (बुधबार) देखि पुनः सक्रिय हुने भएको छ। मौसमविद्का अनुसार भोलिदेखि करिब एक सातासम्म देशका तराई, दक्षिणी भूभाग तथा पहाडी क्षेत्रमा मध्यमदेखि भारी वर्षाको सम्भावना रहेको छ।
मौसमविद् डा. विनोद पोख्रेलका अनुसार मनसुनी न्यून चापीय रेखा पश्चिमी नेपालतर्फ ढल्किएकाले विशेष गरी बागमती प्रदेशभन्दा पश्चिमका जुनसुकै क्षेत्रमा भारी वर्षा हुन सक्नेछ।
मौसम पूर्वानुमान गर्ने अन्तर्राष्ट्रिय मोडेलहरूले पनि फरक-फरक स्थानमा केन्द्रित भई वर्षा देखाएकाले पश्चिमका जुनसुकै भागमा पनि एक्कासि ठूलो पानी पर्न सक्ने जोखिम छ।
“फरक-फरक मौसम मोडेलहरूले फरक स्थानमा वर्षाको सम्भावना देखाएका छन्,” डा. पोख्रेलले भने, “त्यसैले बागमतीभन्दा पश्चिमका सम्पूर्ण क्षेत्रमा आवश्यक पूर्वतयारी र सतर्कता अपनाउनु जरुरी छ।”
