कार्तिक २४ । आज तिहारको चौथो दिन हल तिहार तथा गोवर्धन पूजा मनाइँदै छ। गाउँघरमा गोरुको ठूलो महत्त्व रहेकाले घरमा पालिएका गोरुको पूजा गर्ने चलन छ।
नेपाली समाजमा कृषि पेसामा गोरुको महत्त्वपूर्ण भूमिका रहँदै आएको छ। कृषि कार्यमा गोरुले पुर्याउँदै आएको योगदानको सम्मानस्वरूप गोरुको पूजा गर्ने परम्परा रहेको छ। लक्ष्मीपूजाका दिन गाईको पूजा गरिन्छ भने त्यसको भोलिपल्ट गोरु तिहार मनाउने चलन छ।
पौराणिक मान्यताअनुसार भगवान् श्रीकृष्ण गोकुलमा गाई चराउन जाँदा ठूलो वर्षा भएको थियो। त्यसबेला श्रीकृष्णले गोवर्धन पर्वत उचालेर गोकुलवासी तथा उनीहरूका गाईगोरुलाई वर्षाबाट जोगाएको धार्मिक विश्वास छ। यही मान्यताका आधारमा गोवर्धन पर्वतको पूजा गर्ने परम्परा रहेको छ।
