जेठ ६, काठमाडौँ । रूसी राष्ट्रपति भ्लादिमिर पुटिन दुई दिने औपचारिक भ्रमणका लागि चीनको राजधानी बेइजिङ पुगेका छन्। रूसी राष्ट्रपतिका रूपमा नयाँ कार्यकाल सम्हालेपछिको यो उनको पहिलो विदेश भ्रमण हो।
भ्रमणका क्रममा राष्ट्रपति पुटिनले चिनियाँ राष्ट्रपति सी चिनपिङसँग उच्चस्तरीय भेटवार्ता गर्ने कार्यक्रम रहेको छ। दुई नेताबीचको भेटवार्तामा द्विपक्षीय व्यापार, उर्जा साझेदारी, प्रविधि विकासका साथै युक्रेन युद्ध र विश्वव्यापी रणनीतिक सुरक्षाका विषयमा गहन छलफल हुने जनाइएको छ।
साझेदारी र रणनीतिक सम्बन्धमा जोड चिनियाँ समकक्षी सी चिनपिङको निमन्त्रणामा चीन पुगेका पुटिनलाई बेइजिङमा भव्य स्वागत गरिएको थियो। दुई देशबीचको बिना सीमाको साझेदारीलाई थप मजबुत बनाउन यो भ्रमणलाई निकै महत्त्वपूर्ण रूपमा हेरिएको छ। पश्चिमा देशहरूले लगाएको आर्थिक प्रतिबन्धका बीच रूस र चीनबीचको व्यापारिक तथा रणनीतिक सम्बन्ध हालैका वर्षहरूमा निकै बलियो बन्दै गएको छ।
समाचार एजेन्सीहरूका अनुसार, दुवै देशका प्रमुखहरूले बहुध्रुवीय विश्व व्यवस्थाकाे विकास र अन्तर्राष्ट्रिय मञ्चहरूमा साझा हितका पक्षमा सँगै उभिने प्रतिबद्धता पुनः दोहोर्याउने छन्।
बेइजिङमा हुने औपचारिक भेटवार्ता र सम्झौताहरू पश्चात राष्ट्रपति पुटिनले चीनको अर्को प्रमुख सहरको पनि भ्रमण गर्ने र त्यहाँका व्यापारिक समुदायसँग अन्तर्क्रिया गर्ने तालिका रहेको छ।
