काठमाडौं, २ मङ्सिर । नेपाल कम्युनिष्ट पार्टी (एमाले) का अध्यक्ष केपी शर्मा ओलीले आगामी निर्वाचनहरूमा पार्टीले सशक्त सङ्गठनका साथ विजयको आत्मविश्वास लिएर जाने बताउनुभएको छ ।
मङ्गलबार काठमाडौंको कार्की ब्याङ्क्वेटमा आयोजित पार्टीको दुईदिने राष्ट्रिय भेलाको उद्घाटन गर्दै अध्यक्ष ओलीले भेलाको मूल सन्देश ‘एकता र विजयको आत्मविश्वास’ रहेको बताउनुभएको हो । बिरुवामा जल सिञ्चन गरी भेलाको औपचारिक उद्घाटन गरेपछि बोल्दै उहाँले स्थानीय, प्रदेश र राष्ट्रिय सभाको निर्वाचन नजिकिँदै गरेको उल्लेख गर्दै अगुवा नेता तथा कार्यकर्तालाई उच्च आत्मविश्वासका साथ कार्यक्षेत्रमा खटिन निर्देशन दिनुभयो ।
“पार्टीमा कसैलाई आराम गर्ने छुट छैन, हाम्रो आरामको जिन्दगी होइन,” अध्यक्ष ओलीले भन्नुभयो, “चुनावको परिणामलाई भव्य सफलतामा पुर्याउन एकताको सन्देशलाई सङ्कल्पका रूपमा लिनुपर्छ ।”
सम्बोधनका क्रममा अध्यक्ष ओलीले वर्तमान सरकार स्वेच्छाचारी बाटोतर्फ अघि बढेको आरोप लगाउँदै त्यसको प्रतिरोध गर्न एमाले तयार रहेको बताउनुभयो । मुलुक आर्थिक, सामाजिक र सांस्कृतिक मूल्य–मान्यताका हिसाबले खस्किरहेको टिप्पणी गर्दै उहाँले प्रतिनिधि सभा विघटनसम्बन्धी मुद्दा अदालतमा विचाराधीन रहे पनि फैसलामा ढिलाइ भइरहेको गुनासो गर्नुभयो ।
बन्दसत्रमा कार्यपत्र प्रस्तुत उद्घाटन समारोहलगत्तै सुरु भएको बन्दसत्रमा महासचिव शङ्कर पोखरेलले ‘पार्टीको शुद्धीकरण, सुदृढीकरण र स्थानीय निर्वाचनको कार्ययोजना’ सम्बन्धी कार्यपत्र प्रस्तुत गर्नुभयो । कार्यपत्रमा सङ्गठनात्मक जीवनका प्रमुख १४ वटा समस्या औँल्याउँदै तिनको समाधानका उपायबारे चर्चा गरिएको छ । पार्टीलाई जनमुखी शक्तिका रूपमा प्रस्तुत गर्न हरेक पालिका तहमा जागरण अभियानको संयोजनका लागि केन्द्रीय प्रतिनिधि खटाइसकिएको उहाँले जानकारी दिनुभयो ।
त्यसैगरी, उपाध्यक्ष विष्णुप्रसाद पौडेलले ‘एमालेले देश र जनताको पक्षमा गरेका महत्त्वपूर्ण कार्यहरू’ विषयक कार्यपत्र पेस गर्दै एमाले नेतृत्वको सरकारका पालामा भौतिक पूर्वाधार, आर्थिक वृद्धि र मानवीय विकासका क्षेत्रमा उल्लेखनीय प्रगति भएको दाबी गर्नुभयो । स्वागत मन्तव्य राख्दै सचिव पद्मा अर्यालले आगामी स्थानीय तहको निर्वाचन पार्टीका लागि राजनीतिक परीक्षा भएको बताउँदै जनताका गुनासा सुनेर समाधानको पहल गर्नुपर्नेमा जोड दिनुभयो ।
३,४१४ प्रतिनिधिको सहभागिता ‘निर्णायक राष्ट्रिय शक्ति निर्माण हाम्रो सङ्कल्प, समृद्ध नेपाल, सुखी नेपाली हाम्रो गन्तव्य’ भन्ने मूल नाराका साथ सुरु भएको भेलामा केन्द्रीय कमिटीदेखि पालिका कमिटीसम्मका नेता तथा जनप्रतिनिधि गरी देशभरबाट ३ हजार ४१४ प्रतिनिधि सहभागी छन् ।
सचिव भानुभक्त ढकालले सञ्चालन गर्नुभएको उद्घाटन सत्रमा वरिष्ठ नेता तथा पूर्वराष्ट्रपति विद्यादेवी भण्डारी, उपाध्यक्षहरू रामबहादुर थापा ‘बादल’, विष्णुप्रसाद पौडेल, पृथ्वीसुब्बा गुरुङ, गोकर्ण विष्ट, रघुजी पन्त, उपमहासचिवहरू, सचिवहरू, स्थायी कमिटी सदस्यहरू, विभिन्न आयोगका अध्यक्षहरू तथा ज्येष्ठ कम्युनिष्ट व्यक्तित्वहरूको उपस्थिति रहेको थियो ।
पार्टीको केन्द्रीय प्रचार तथा प्रकाशन विभाग प्रमुख निरज आचार्यले जारी गर्नुभएको प्रेस नोटअनुसार भेलाको दोस्रो दिन भोलि मङ्सिर ३ गते बिहान ८ बजेदेखि सुरु हुने सत्रमा अध्यक्ष ओली, वरिष्ठ नेता भण्डारी र उपाध्यक्ष थापाले विभिन्न समसामयिक तथा सङ्गठनात्मक विषयमा सम्बोधन गर्ने कार्यक्रम तय भएको छ ।














