सिन्धुलीबाट बलराम अधिकारीको सहयोगमा ।
पुस १० सिन्धुली । दक्षिण कोरियाले उपहार स्वरुप दिएको उन्नत जातको गाईका बाच्छीहरू सिन्धुलीको कमलामाई नगरपालिकाका किसानहरुलाई वितरण गरिएको छ ।
कमलामाई नगरपालिका वडा नम्बर ५ का ५० जना किसानलाई ८१ वटा उन्नत जातका कोरली बाच्छी वितरण गरिएको हो ।
हेफर ईन्टरनेशनल नेपाल, कमलामाई नगरपालिकाको आर्थिक तथा प्राविधिक सहयोग र सिड्स नेपाल सिन्धुलीको आयोजनामा संचालित मिल्की वेय कार्यक्रम अन्तरगत उक्त बाच्छी वितरण गरिएको हो ।
मिल्की वेय कार्यक्रम अन्तरगत कमलामाई नगरपालिका ५ मा बनेका चार वटा सामाजिक उद्यमी महिला कृषक समूहमा आबद्ध भएका ५० जना महिलाहरुलाई बाच्छी उपहार दिइएको सिड्स नेपाल सिन्धुलीका अध्यक्ष दिपक घिमिरेले जानकारी दिनुभयो ।
सिन्धुली सहित देशकै दुग्ध क्षेत्रको रुपान्तरण र विकासका लागि हेफर ईन्टरनेशनल नेपाल, कमलामाई नगरपालिकाको आर्थिक तथा प्राविधिक सहयोग र सिड्स नेपाल सिन्धुलीको आयोजनामा १० बर्षे मिल्की वेय कार्यक्रम संचालन भइरहेको छ ।
आईतवार आयोजित एक कार्यक्रमका बिच प्रतिनिधिसभा सदस्य लेखनाथ दाहाल(राजन)ले कोरियाबाट ल्याइएका होलिस्टिन जातका बाच्छी महिला किसानहरुलाई हस्तान्तरण गर्नुभएको छ ।
किसानलाई बाच्छी हस्तान्तरण गर्दै प्रतिनिधिसभा सदस्य दाहालले कोरियाले दिएको उन्नत जातका बाच्छीहरुबाट उत्पादन भएका दुधले सिन्धुली र देशकै दुग्ध क्षेत्रमा ठुलो टेवा पुर्याउने विश्वास व्यक्त गर्नुभयो ।
अहिलेसम्म गरिएको परम्परागत र निर्वाहमुखी कृषिले किसानको जिवनस्तर बदल्न नसकेको भन्दै उहाँले बाच्छी उपहार पाएका किसानहरुलाई व्यवसायीक रुपमा गाई पालनमा लाग्न आग्रह गर्नुभयो । उहाँले कृषिमा उत्पादन बढाउन र किसानको जिवनस्तर उकास्न व्यवसायीक कृषिमा जोड दिनुपर्ने बताउनुभयो ।
कमलामाई नगरपालिकाका मेयर उपेन्द्र कुमार पोखरेलले पनि परम्परागत रुपमा गर्दै आएको कृषिलाई छोडेर व्यवसायीक कृषि र पशुपालनमा जोड दिनुपर्ने बताउनुभयो । अहिले वितरण गरिएका बाच्छीहरुमा केही समस्या देखिएमा वा रोगहरु लागेमा त्यसको उपचारमा कमलामाई नगरपालिकाले गम्भिर भएर ध्यान दिने मेयर पोखरेलले बताउनुभयो ।
