काठमाडौँ — बुधबार रातिदेखि परेको अविरल वर्षाका कारण सप्तकोशी नदीमा जलसतह तीव्र गतिमा बढेपछि कोशी ब्यारेजका ५६ मध्ये ४३ वटा ढोका खोलिएका छन्।
शनिबार बिहान ६ बजेको पछिल्लो मापन अनुसार कोशी ब्यारेजमा पानीको बहाव प्रतिसेकेन्ड ३ लाख १६ हजार ७ सय ९५ क्युसेक पुगेको छ। जलसतह लगातार बढेपछि सुरक्षा र सम्भावित जोखिमलाई मध्यनजर गर्दै ब्यारेजका ढोकाहरू क्रमश: थपिँदै लगिएको हो।
यसअघि शुक्रबार बिहान १० बजे पानीको बहाव १ लाख ९८ हजार २ सय २० क्युसेक रहँदा २५ वटा ढोका खोलिएका थिए। दिउँसो १ बजे बहाव बढेर २ लाख २९ हजार ९ सय ६० क्युसेक पुगेपछि ३० वटा र दिउँसो २ बजे २ लाख ४० हजार ५ सय ५५ क्युसेक पुगेपछि ३१ वटा ढोका खुला गरिएको थियो।
नदीमा पानीको बहाव खतराको तहभन्दा माथि पुगेपछि सर्वसाधारणलाई सचेत गराउन जोखिमको सङ्केतस्वरूप ब्यारेजको पश्चिमतर्फ रातो बत्ती बालिएको छ।
सप्तकोशीमा जलसतह निरन्तर बढ्दो क्रममा रहेकाले नदी तटीय तथा आसपासका बासिन्दालाई उच्च सतर्कता अपनाउन र जोखिमपूर्ण क्षेत्रमा नजान स्थानीय प्रशासन तथा सरोकारवाला निकायले विशेष आग्रह गरेका छन्।
