रसुवा बाढी प्रभावित क्षेत्रमा ‘ड्रोन हब नेपाल’द्वारा ड्रोनमार्फत क्षतिको अनुगमन गरिने

रसुवा — रसुवामा आएको विनाशकारी बाढीबाट भएको जनधन तथा भौतिक क्षतिको वास्तविक अवस्था पहिचान तथा अभिलेखीकरण गर्न ड्रोन हब नेपाल प्राइभेट कम्पनी लिमिटेडले आजबाट बाढी प्रभावित क्षेत्रमा ड्रोनमार्फत अनुगमन गर्ने भएको छ।
बाढीका कारण रसुवाका विभिन्न क्षेत्रमा घर, सडक, पुल, सरकारी तथा निजी संरचना, व्यापारिक क्षेत्र, जलविद्युत् आयोजना तथा अन्य भौतिक संरचनामा ठूलो क्षति पुगेको छ। बाढी प्रभावित क्षेत्रका कतिपय स्थानमा स्थलगत रूपमा पुगेर क्षतिको विवरण संकलन गर्न कठिन भइरहेको अवस्थामा ड्रोन प्रविधिको प्रयोगमार्फत प्रभावित क्षेत्रको विस्तृत अवस्था पहिचान गर्न लागिएको हो।
ड्रोन हब नेपालले प्रभावित क्षेत्रमा ड्रोन उडाएर बाढीले पुर्‍याएको क्षतिको दृश्य अभिलेख तथा तथ्यांक संकलन गर्नेछ। यस क्रममा क्षतिग्रस्त घर तथा बस्ती, सडक, पुल, विद्युत् तथा जलविद्युत् संरचना, व्यापारिक तथा औद्योगिक क्षेत्र, कृषि तथा जमिनलगायतका क्षेत्रमा भएको क्षतिको अवस्था अध्ययन गरिनेछ।
त्यसैगरी, बाढीबाट भएको मानवीय क्षति, बेपत्ता तथा प्रभावित नागरिकको अवस्था र समग्र क्षेत्रको वस्तुस्थितिसमेत अध्ययन तथा अभिलेखीकरण गर्न सम्बन्धित निकायसँग आवश्यक समन्वय गरिनेछ।
ड्रोनमार्फत गरिने अनुगमनबाट बाढी प्रभावित क्षेत्रको वास्तविक अवस्थाको डिजिटल अभिलेख तयार हुनुका साथै क्षतिको परिमाण पहिचान गर्न र आगामी राहत, पुनर्स्थापना तथा पुनर्निर्माणका लागि आवश्यक तथ्यांक उपलब्ध गराउन सहयोग पुग्ने अपेक्षा गरिएको छ।
हाल रसुवामा बाढीपछि उद्धार तथा खोजी कार्य जारी रहेको छ। प्रभावित क्षेत्रमा सडक, पुल, विद्युत् तथा अन्य पूर्वाधारमा समेत ठूलो क्षति पुगेको प्रारम्भिक विवरण सार्वजनिक भएका छन्।
प्रविधिको प्रयोगमार्फत विपद्पछिको वास्तविक क्षति पहिचान गर्ने उद्देश्यले ड्रोन हब नेपालले सञ्चालन गर्न लागेको यो अनुगमनले रसुवाको बाढीबाट भएको क्षतिको यथार्थ विवरण संकलनमा महत्वपूर्ण सहयोग पुग्ने अपेक्षा गरिएको छ।