काठमाडौँ । आज बिहान ८ बजेदेखि देशभर एकैसाथ माध्यमिक शिक्षा परीक्षा (एसईई) सुरु भएको छ।
राष्ट्रिय परीक्षा बोर्ड, परीक्षा नियन्त्रण कार्यालय (कक्षा १०) का अनुसार परीक्षाको पहिलो दिन आज परीक्षार्थीहरूले अनिवार्य अंग्रेजी विषयको परीक्षा दिइरहेका छन्। यो परीक्षा आगामी चैत २९ गतेसम्म सञ्चालन हुने तालिका रहेको छ।
यस वर्षको एसईईमा सहभागी हुन देशभरबाट कुल ५ लाख १२ हजार ४२१ जना विद्यार्थीले आवेदन फाराम भरेका थिए। जसमध्ये नियमिततर्फ ४ लाख ४१ हजार ५६६ जना र ग्रेड वृद्धितर्फ ७० हजार ८५५ जना परीक्षार्थी रहेका छन्।
लिङ्गका आधारमा हेर्दा २ लाख ५७ हजार ६१३ छात्रा, २ लाख ५४ हजार ८०१ छात्र र अन्य ७ जना परीक्षार्थी यस शैक्षिक महाकुम्भमा सामेल भएका छन्।
परीक्षालाई शान्तिपूर्ण र मर्यादित बनाउन देशभर १ हजार ९६६ परीक्षा केन्द्रहरू निर्धारण गरिएको छ। सुरक्षाका लागि प्रत्येक केन्द्रमा १५ जना प्रहरी परिचालन गरिएको छ। व्यवस्थापकीय कार्यका लागि हरेक केन्द्रमा एक केन्द्राध्यक्ष, एक सहायक केन्द्राध्यक्षसहित प्रति २० परीक्षार्थी बराबर एक निरीक्षक र १०० परीक्षार्थी बराबर एक कार्यालय सहयोगी खटाइएको बोर्डले जनाएको छ।
बोर्डले यस वर्षको परीक्षालाई विगतभन्दा थप प्रविधिमैत्री र नतिजामुखी बनाउन विशेष रणनीतिक योजना अघि सारेको छ। बोर्डले यसपटक ‘उत्तरपुस्तिका परीक्षणको विकेन्द्रीकरण’ गर्ने नीति लिएको छ, जसअन्तर्गत सम्बन्धित परीक्षा केन्द्रबाटै उत्तरपुस्तिका परीक्षण गरिनेछ। यो नयाँ अभ्यासका कारण परीक्षा सम्पन्न भएको एक महिनाभित्रै नतिजा सार्वजनिक हुनेछ।
