विपद् र निःशुल्क सेवाका बाबजुद नेपाल टेलिकमको खुद नाफामा ३७.३५ प्रतिशतको छलाङ, १ अर्ब ८२ करोड नाफा आर्जन

काठमाडौँ । प्राकृतिक विपद्का कारण सेवा अवरुद्ध हुनुका साथै प्रभावित क्षेत्रमा निःशुल्क सेवा उपलब्ध गराउँदा पनि नेपाल टेलिकम (नेपाल दूरसञ्चार कम्पनी लिमिटेड) ले चालु आर्थिक वर्ष २०८३/८४ को पहिलो त्रैमासिकमा उल्लेख्य वित्तीय प्रगति हासिल गरेको छ ।

कम्पनीले सार्वजनिक गरेको चालु आवको प्रथम त्रैमासिक अपरिष्कृत वित्तीय विवरण (Unaudited) अनुसार टेलिकमको खुद नाफा गत आर्थिक वर्षको सोही अवधिको तुलनामा ३७.३५ प्रतिशत अर्थात् ४९ करोड ४९ लाख रुपैयाँले वृद्धि भई १ अर्ब ८२ करोड १ लाख रुपैयाँ पुगेको छ । गत आवको पहिलो त्रैमासिकमा कम्पनीले १ अर्ब ३२ करोड ५१ लाख रुपैयाँ खुद नाफा कमाएको थियो ।

नाफामा आएको उल्लेख्य सुधारसँगै कम्पनीको वार्षिक प्रतिशेयर आम्दानी (EPS) ४० रुपैयाँ ४५ पैसा कायम भएको छ ।

खर्च कटौतीले बढायो नाफा समीक्षा अवधिमा कम्पनीको कर अघिको मुनाफा ३.६५ प्रतिशत (१० करोड ५२ लाख रुपैयाँ) ले बढेर २ अर्ब ९८ करोड ७४ लाख रुपैयाँ पुगेको छ । यद्यपि, ब्याज, कर तथा ह्रासकट्टी अघिको नाफा (EBITDA) भने ६.१३ प्रतिशतले घटेर ४ अर्ब ४५ करोड ९० लाख रुपैयाँमा सीमित भएको छ ।

कर्मचारीको तलब स्केल वृद्धिका कारण प्रशासनिक खर्च बढे पनि ह्रास खर्चमा आएको कमी र मूल्यह्रास क्षति फिर्ता समायोजन (Impairment Reversal) का कारण समग्र खुद खर्च ४८ करोड १२ लाख रुपैयाँ (५.९० प्रतिशत) ले घटेको छ । खर्चमा आएको यही नियन्त्रणले खुद नाफामा उच्च वृद्धि देखिएको हो ।

कुल आय ९ अर्ब ४७ करोड माथि कम्पनीको कुल आय गत वर्षको तुलनामा ०.०७ प्रतिशत (६६ लाख ४६ हजार रुपैयाँ) ले वृद्धि भई ९ अर्ब ४७ करोड ७६ लाख रुपैयाँ पुगेको छ । यस्तै, कुल सञ्चालन आय ८ अर्ब ६७ करोड ८२ लाख रुपैयाँ रहेको छ ।

टेलिकमका अनुसार कम मूल्यका ठूला डेटा प्याकेजको बढ्दो प्रयोगका कारण जीएसएम (GSM) तर्फ १० लाख १६ हजार रुपैयाँ र एफटीटीएच (FTTH) तर्फ ४ करोड ४० लाख रुपैयाँले कार्यसञ्चालन राजस्व वृद्धि भएको छ ।

बाढीपहिरो र निःशुल्क सेवाको असर चालु आवको पहिलो त्रैमासिकमा रसुवाको भोटेकोशी (भदौ १०) र बुढीगण्डकी (असोज २५) क्षेत्रमा आएको विनाशकारी बाढीपहिरोका कारण टेलिकमको सेवा र व्यावसायिक गतिविधिमा नकारात्मक असर परेको थियो । भोटेकोशी बाढी प्रभावित सेवाग्राहीलाई टेलिकमले १७ दिनसम्म निःशुल्क भ्वाइस तथा डेटा सेवा उपलब्ध गराउँदा सेवा बिक्रीबाट प्राप्त हुने राजस्वमा केही संकुचन आएको कम्पनीले जनाएको छ ।

कम प्रतिफल आउने विकट तथा दुर्गम क्षेत्रमा समेत सेवा विस्तार र गुणस्तर सुधारलाई प्राथमिकतामा राख्दै टेलिकमले आफ्नो वित्तीय सन्तुलन मजबुत बनाइराखेको देखिएको छ ।

वित्तीय विवरणको मुख्य झलक (प्रथम त्रैमासिक तुलना):