काठमाडौं — नेपाल एसोसिएसन अफ टुर एन्ड ट्राभल एजेन्ट्स (नाट्टा) ले पर्यटन क्षेत्रलाई राष्ट्रिय प्राथमिकताको उद्योगका रूपमा स्थापित गर्न, नीतिगत सुधार गर्न र व्यवसायीका समस्या समाधान गर्न विभिन्न रणनीतिक योजना अघि सारेको छ। पर्यटनलाई अर्थतन्त्र, रोजगारी, कृषि, संस्कृति र पूर्वाधारसँग जोड्दै समग्र देशको पहिचानका रूपमा विकास गर्ने लक्ष्य संघले लिएको छ।
नीतिगत सुधार तथा कर छुटका एजेन्डा
- हवाई भाडा र पर्यटन विधेयक: हवाई भाडामा लाग्ने भ्याट (VAT) खारेजी, पर्यटन विधेयकमा व्यवसायीको हकहित सुनिश्चित गर्दै शीघ्र पारित गराउन निरन्तर नीतिगत पहल गरिने।
- विदेशी मुद्रा र सहुलियत: विदेशी मुद्रा भित्र्याउने व्यवसायीलाई प्रोत्साहन तथा ‘रिबेट’ उपलब्ध गराउन पहल गर्ने।
- सवारीसाधन भन्सार किस्ताबन्दी: लक्जरी पर्यटक सवारीसाधन आयातमा लाग्ने करिब ३०० प्रतिशत भन्सार तथा अन्य शुल्क एकमुष्ट नभई ५ वर्षसम्म किस्ताबन्दीमा तिर्न पाउने व्यवस्थाका लागि सरकारसँग पैरवी गर्ने।
कनेक्टिभिटी र गन्तव्य प्रवर्द्धन
- अन्तर्राष्ट्रिय विमानस्थल सञ्चालन: पोखरा र गौतम बुद्ध अन्तर्राष्ट्रिय विमानस्थलबाट क्षेत्रीय तथा अन्तर्राष्ट्रिय कनेक्टिभिटी विस्तार गर्ने।
- अफ-सिजन सहुलियत र वेलनेस टुरिजम: ‘अफ-सिजन’ हवाई भाडामा अनुदान (Subsidy) का लागि एयरलाइन्ससँग समन्वय गर्ने तथा नेपाललाई अन्तर्राष्ट्रिय ‘वेलनेस डेस्टिनेसन’का रूपमा प्रवर्द्धन गर्न अनुसन्धान र प्रकाशन गर्ने।
- बजार विस्तार: सेल्स मिसन, रोड शो, बिटुबी (B2B) र संघद्वारा सुरु गरिएको ‘बीआईटीएम’ (BITM) लाई निरन्तरता दिँदै अन्तर्राष्ट्रिय मेलाहरूमा सहभागिताको स्तर बढाउने।
व्यवसायी हकहित, IATA र कानुनी सहजीकरण
- हेल्प डेस्क स्थापना: सदस्य व्यवसायीका कानुनी तथा वित्तीय समस्या समाधान गर्न नाट्टामा छुट्टै ‘Legal & Financial Help Desk’ सञ्चालन गर्ने।
- टिकटिङ र कमिसन व्यवस्थापन: आएटा (IATA) बैंक जमानत राख्ने ट्राभल एजेन्सीलाई अनिवार्य ‘क्यापिङ’ सुविधा दिलाउन, भोइड चार्ज र नन-रिफन्डेबल टिकट समस्या समाधान गर्न तथा अन्तर्राष्ट्रिय टिकटलाई कमिसनेबल (Commissionable) बनाउन पहल गर्ने।
- यात्रु डिपोट समस्या: यात्रु डिपोट हुँदा ट्राभल एजेन्सीमाथि पर्ने अनावश्यक कानुनी झमेला समाधान गर्न समन्वय गरिने।
पूर्वाधार, कूटनीति र आउटबाउन्ड सहजीकरण
- पर्यटक बसपार्क: सम्बन्धित निकायसँग समन्वय गरी उपयुक्त पार्किङ क्षेत्र पहिचान र छुट्टै व्यवस्थित पर्यटक बसपार्क स्थापना गर्ने।
- कूटनीतिक प्रवर्द्धन र सफ्ट पावर: नेपाली कला, संस्कृति, खानपान र आतिथ्यलाई ‘सफ्ट पावर’का रूपमा प्रवर्द्धन गर्न विदेशी नियोग तथा दूतावाससँग सहकार्य गर्ने र ब्लगर तथा कूटनीतिज्ञका लागि ‘फ्याम ट्रिप’ (FAM Trip) आयोजना गर्ने।
- आउटबाउन्ड तथा क्षेत्रीय भ्रमण: आउटबाउन्ड टुरमा देखिएका विदेशी मुद्रा तथा भुक्तानी समस्या समाधान गर्ने र भुटान, तिब्बत तथा कैलाश मानसरोवर यात्रामा रहेका नीतिगत तथा व्यावहारिक समस्या सुल्झाउन विशेष पहल गर्ने।
संघले डिजिटल प्रणालीमार्फत सेवा, सूचना र गुनासो व्यवस्थापनलाई एकीकृत गर्ने तथा ‘नाट्टा पडकास्ट/टुरिजम डाइलग’ मार्फत सरकारसँग स्थायी संवाद कायम गर्ने तयारी समेत गरेको छ।
