काठमाडौं । नेपाल टेलिकमले चालु आर्थिक वर्ष २०८२/८३ को तेस्रो त्रैमासिकसम्म आइपुग्दा आम्दानी र नाफा दुवैमा उल्लेख्य सुधार गरेको छ। (Unaudited) वित्तीय विवरणअनुसार कम्पनीको कुल सञ्चालन आय २५ अर्ब ९२ करोड ९६ लाख रुपैयाँ पुगेको छ, जुन गत आर्थिक वर्षको सोही अवधिको तुलनामा ६१ करोड २० लाख रुपैयाँ (२.४२ प्रतिशत) ले बढी हो। यसैगरी कुल आय २८ अर्ब ८५ करोड ४८ लाख रुपैयाँ पुगेको छ, जुन अघिल्लो वर्षभन्दा ४२ करोड ३३ लाख रुपैयाँ (१.४९ प्रतिशत) ले वृद्धि भएको हो।
नाफातर्फ पनि टेलिकमको प्रदर्शन सन्तोषजनक देखिएको छ। तेस्रो त्रैमासिकसम्म EBITDA १४ अर्ब ३८ करोड २ लाख रुपैयाँ पुगेको छ, जुन गत वर्षको तुलनामा १८ करोड ८० लाख रुपैयाँ (१.३२ प्रतिशत) ले वृद्धि हो। सबै खर्च कटाएर खुद मुनाफा ६ अर्ब २७ करोड २९ लाख रुपैयाँ कायम भएको छ, जसले अघिल्लो वर्षको तुलनामा ५६ करोड २४ लाख रुपैयाँ अर्थात् ९.८५ प्रतिशतको उल्लेखनीय वृद्धि देखाउँछ। प्रति शेयर आम्दानी (वार्षिक आधारमा) पनि ४६.४७ रुपैयाँ पुगेको छ, जुन गत वर्षको ४२.३ रुपैयाँको तुलनामा ९.९ प्रतिशतले बढी हो।
कम्पनीका अनुसार चालु आर्थिक वर्षमा राजश्व तथा खुद मुनाफामा देखिएको परिवर्तनका पछाडि केही प्रमुख कारण रहेका छन्। घट्दो ब्याजदरका कारण ब्याज आयमा करिब ५७ करोड ६६ लाख रुपैयाँ (२०.५७ प्रतिशत) कमी आएको भए पनि GSM सेवाबाट हुने सञ्चालन राजश्व ५७ करोड ७४ लाख रुपैयाँ (२.७६ प्रतिशत) ले बढेको छ। साथै, ह्रासकट्टी खर्चमा ३८ करोड ६९ लाख रुपैयाँ (८.४६ प्रतिशत) ले कमी आउनुले पनि नाफा सुधारमा सकारात्मक योगदान दिएको छ।
