काठमाडौं। नेपाल इन्फ्रास्ट्रक्चर बैंक (निफ्रा) को आठौँ वार्षिक साधारण सभा शुक्रबारका दिन काठमाडौंको बत्तिसपुतलीस्थित अनुपम फुडल्याण्ड एण्ड ब्याङ्क्वेटमा भव्यताका साथ सम्पन्न भएको छ।
बैंक सञ्चालक समितिका अध्यक्ष महेश प्रसाद दहालको अध्यक्षतामा सम्पन्न उक्त साधारण सभामा चुक्ता पूँजीको ५.२६३२ प्रतिशत नगद लाभांश वितरण गर्ने लगायत पेश गरिएका सम्पूर्ण प्रस्तावहरू सर्वसम्मतिले पारित भएका छन्।
सभालाई सम्बोधन गर्दै अध्यक्ष दहालले बैंकले समीक्षा अवधिमा हासिल गरेका उपलब्धि, चालु आर्थिक वर्षका योजना तथा लक्ष्य एवं भावी रणनीतिको विषयमा शेयरधनीहरूलाई विस्तृत जानकारी गराएका थिए। साथै, आर्थिक वर्ष २०८२/८३ को अन्त्यसम्म आइपुग्दा बैंकले पूर्वाधारका विभिन्न ५० वटा परियोजनाहरूमा रु ५६ अर्ब १३ करोडको लगानी स्वीकृत गरी रु ३१ अर्ब ६३ करोड कर्जा प्रवाह गरिसकेको जानकारी दिइयो। पूर्वाधार विकासको क्षेत्रमा लगानी गर्ने विषय जटिल र समय लाग्ने भए तापनि बैंकले स्थापना कालदेखि नै खराब कर्जा (Non Performing Loan – NPL) लाई करीब शून्य प्रतिशतमा कायम राख्न सफल भएको तथ्य प्रस्तुत गर्नु भएको थियो।
उक्त अवसरमा बैंक सञ्चालक समितिका सदस्यहरू बन्धु प्रसाद बाँस्तोला, सुरेन्द्र रेग्मी, दिपक कुमार अग्रवाल, विशाल उप्रेती, डा. मनिष थापा र अनिता रायमाझी तथा बैंकका प्रमुख कार्यकारी अधिकृत कृष्ण बहादुर अधिकारीलगायत शेयरधनी तथा अन्य पदाधिकारीहरूको उपस्थिति रहेको थियो।
शेयरधनीहरूको उल्लेख्य उपस्थिति रहेको सो सभामा लगानीकर्ताको प्रतिफल वृद्धि गर्ने, संस्थागत सुशासन, पारदर्शिता र व्यावसायिक दक्षता अभिवृद्धि गर्दै निफ्रालाई अझ सबल वित्तीय संस्थाका रूपमा स्थापित गर्दै लैजाने प्रतिबद्धतासमेत व्यक्त गरिएको थियो।
