काठमाडौँ — आगामी दसैँ, तिहार तथा छठ पर्वलाई लक्षित गर्दै असोज २३ गतेदेखि सार्वजनिक यातायातको अग्रिम टिकट बुकिङ खुला हुने भएको छ। यातायात व्यवस्था विभागमा मंगलबार बसेको उच्चस्तरीय बैठकले चाडपर्वमा काठमाडौँ उपत्यकाबाट घर फर्किने यात्रुहरूको यात्रा सहज र व्यवस्थित बनाउन अग्रिम टिकट बिक्री सुरु गर्ने निर्णय गरेको हो।
उक्त बैठकमा यातायात व्यवसायी राष्ट्रिय महासंघ, यातायात श्रमिक संगठन, नेपाल प्रहरी, ट्राफिक प्रहरी र नयाँ बसपार्क व्यवस्थापनको जिम्मेवारी पाएको ल्होत्से बहुउद्देश्यीय प्रालिका प्रतिनिधिहरूको उपस्थिति रहेको थियो।
१० लाखभन्दा बढी मानिस बाहिरिने अनुमान
अखिल नेपाल यातायात मजदुर संगठनका अध्यक्ष दीपक केसीका अनुसार यसपटकको दसैँ अवधिमा मात्रै १० लाखभन्दा बढी मानिसले काठमाडौँ उपत्यका छाड्ने अनुमान गरिएको छ।
यात्रुको सुरक्षा तथा लामो दूरीको यात्रालाई व्यवस्थित र सुरक्षित बनाउन बैठकले लामो दूरीका सवारीसाधनमा अनिवार्य रूपमा कम्तीमा दुई जना चालक राख्नुपर्ने व्यवस्था गरेको छ। साथै, टिकट काउन्टरका कर्मचारीले परिचयपत्रसहित तोकिएको पोसाक लगाउनुपर्ने र टिकट बिक्री गर्दा यात्रुको नाम तथा सम्पर्क नम्बर अनिवार्य अभिलेखमा राख्नुपर्नेछ।
ठगी र कालोबजारी गर्नेलाई कडा कारबाही
चाडपर्वको मौका छोपेर तोकिएको भन्दा बढी भाडा असुल्ने, टिकटको कालोबजारी गर्ने वा अन्य अनियमिततामा संलग्न हुने व्यक्ति तथा व्यवसायीलाई कडा कानुनी कारबाही गरिने विभागले चेतावनी दिएको छ।
यात्रुको सुरक्षा, दुर्घटना तथा सडक अवरोधसम्बन्धी विवरण तत्काल आदानप्रदान गर्न केन्द्रीय सूचना केन्द्र सञ्चालन गर्ने तयारी गरिएको छ। यसका साथै यात्रुवाहक बसहरूमा प्राथमिक उपचारका सामग्री, अग्निPost-नियन्त्रण उपकरण र पर्याप्त पिउने पानी अनिवार्य राख्नुपर्नेछ। बसपार्क र टिकट काउन्टरहरूमा हुने भीडभाड व्यवस्थापनका लागि सुरक्षा निकायलाई प्रभावकारी रूपमा परिचालन गरिने भएको छ।
