काठमाडौँ। नेपालको निजी क्षेत्रको छाता संस्था, नेपाल उद्योग वाणिज्य महासंघले अर्थशास्त्री तथा निजी क्षेत्र विकास विज्ञ डा. गोपालप्रसाद तिवारीलाई महानिर्देशक पदमा नियुक्त गरेको छ।
महासंघका अध्यक्ष अन्जन श्रेष्ठले सचिवालयमा आयोजित एक कार्यक्रमका बीच असोज १ गतेदेखि लागू हुने गरी डा. तिवारीलाई नियुक्ति पत्र प्रदान गर्नुभएको हो।
कार्यक्रममा डा. तिवारीलाई स्वागत गर्दै अध्यक्ष श्रेष्ठले उहाँको बहुपक्षीय विश्वसनीयता, प्राज्ञिक दक्षता र निजी क्षेत्रको वकालतसम्बन्धी व्यावहारिक अनुभव महासंघका लागि महत्वपूर्ण साबित हुने बताउनुभयो। “नेपालको आर्थिक संरचनामा डा. तिवारीको गहिरो पकड, बृहत् अन्तर्राष्ट्रिय अनुभव र सरोकारवालाहरूको विश्वासले महासंघको संस्थागत छविलाई थप उचाइमा पुर्याउनेछ,” अध्यक्ष श्रेष्ठले भन्नुभयो, “हाम्रो नीतिगत पैरवीलाई अझ प्रभावकारी बनाउन र नेपाली उद्यमहरूका लागि गतिशीलता सिर्जना गर्न उहाँको नेतृत्व महत्त्वपूर्ण हुनेछ।”
यसअघि पनि सन् २०१८ देखि २०१९ सम्म महासंघको कार्यवाहक महानिर्देशकको रूपमा काम गरिसक्नुभएका डा. तिवारीको यो महासंघमा पुनरागमन हो। उहाँसँग बृहत् आर्थिक नीति, लगानी सुधार तथा सार्वजनिक-निजी साझेदारी (PPP) को क्षेत्रमा २५ वर्षभन्दा लामो अनुभव रहेको छ।
डा. तिवारीले यसअघि अन्तर्राष्ट्रिय वित्त निगम (IFC)/विश्व बैंक समूह, एसियाली विकास बैंक (ADB), संयुक्त राष्ट्रसंघीय विकास कार्यक्रम (UNDP), अन्तर्राष्ट्रिय श्रम संगठन (ILO) र USAID को ‘तयार नेपाल’ आयोजनामा सल्लाहकार तथा निर्देशकको रूपमा काम गरिसक्नुभएको छ।
साथै, उहाँले बैंक तथा वित्तीय संस्था परिसंघ नेपाल (CBFIN) को महानिर्देशक, उद्योग, वाणिज्य तथा आपूर्ति मन्त्रालयमा वरिष्ठ प्राविधिक विज्ञ र नेपाल-जर्मन उद्योग वाणिज्य संघमा रणनीतिक सल्लाहकारको रूपमा समेत सेवा दिइसक्नुभएको छ।
संस्थागत जिम्मेवारीका अलावा डा. तिवारी नेपाल आर्थिक संघका मानार्थ महासचिव, नेपाल आर्थिक पत्रकार समाज (SEJON) का पूर्व अध्यक्ष र त्रिभुवन विश्वविद्यालयका प्राध्यापक समेत हुनुहुन्छ। आफ्नो करियरको सुरुवाती चरणमा उहाँले कान्तिपुर मिडिया ग्रुप, द हिमालयन टाइम्स र स्पेस टाइम टुडे जस्ता प्रमुख पत्रिकाहरूमा वरिष्ठ आर्थिक पत्रकारका रूपमा काम गर्नुभएको थियो।
अर्थशास्त्रमा विद्यावारिधि गर्नुभएका डा. तिवारीका व्यापार कूटनीति र औद्योगिक विकाससम्बन्धी विभिन्न अनुसन्धानमूलक पुस्तकहरू प्रकाशित छन्।
