काठमाडौँ। नेपाली तेक्वान्दोका अन्तर्राष्ट्रिय निर्णायक बब्लु शिवाकोटीले जापानको आईची-नागोया शहरमा आयोजना हुने २०औँ एसियाली खेलकुदमा तेक्वान्दो खेलको निर्णायकको भूमिका निर्वाह गर्ने भएका छन्। आगामी सेप्टेम्बर १९ देखि अक्टोबर ४ तारिखसम्म आयोजना हुने एसियाली खेलकुदमा एसियाका ४५ राष्ट्र तथा क्षेत्रका खेलाडीहरूले विभिन्न खेलमा प्रतिस्पर्धा गर्नेछन्।
ग्योरोगी र पुम्से दुवै विधामा अन्तर्राष्ट्रिय निर्णायकको मान्यता प्राप्त शिवाकोटीका लागि एसियन गेम्समा निर्णायकको जिम्मेवारी नेपाली तेक्वान्दोको प्राविधिक क्षमताको अन्तर्राष्ट्रिय पहिचानका रूपमा हेरिएको छ। उनी नेपाल तेक्वान्दो संघका केन्द्रीय सदस्य समेत हुन् भने दुई कार्यकाल संघका टेक्निकल डेलिगेट्स (टीडी) समेत भई आफ्नो उत्कृष्ट व्यवस्थापकीय सीपद्वारा तेक्वान्दो खेल प्रतियोगिताको स्तर उन्नतिमा समेत योगदान दिइसकेका छन्।
शिवाकोटीले सन् २०२३ जनवरी १२ देखि १५ सम्म संयुक्त अरब इमिरेट्सको दुबईमा आयोजना भएको अन्तर्राष्ट्रिय ग्योरोगी रेफ्री कोर्स उत्तीर्ण गरेका थिए। त्यसपछि सन् २०२४ सेप्टेम्बर १७ देखि २५ सम्म आयोजना भएको अन्तर्राष्ट्रिय पुम्से रेफ्री कोर्स पनि उत्तीर्ण गर्दै उनले दुवै विधामा अन्तर्राष्ट्रिय निर्णायकका रूपमा आफ्नो स्थान बनाएका थिए।
शिवाकोटीले अस्ट्रेलिया, जापान, चीन, भियतनाम, मलेसिया, थाइल्यान्ड, श्रीलंका, बंगलादेश, भारत, मंगोलियामा आयोजना भएका विभिन्न अन्तर्राष्ट्रिय एवम् एसियन तेक्वान्दो प्रतियोगिताहरूमा निर्णायकको भूमिका निर्वाह गरिसकेका छन्। उनको अन्तर्राष्ट्रिय निर्णायक यात्रामा पछिल्लो समय महत्वपूर्ण प्रतियोगिताहरू थपिँदै गएका छन्। सन् २०२६ मा अस्ट्रेलियाको गोल्डकोस्टमा भएको डब्लुटी प्रेसिडेन्ट्स कप (जी-३) ओपन तेक्वान्दो प्रतियोगितामा पनि शिवाकोटीले निर्णायकको भूमिका निर्वाह गरेका थिए। त्यसैगरी, सन् २०२६ मेमा मंगोलियाको उलानबोटारमा भएको २७औँ एसियन तेक्वान्दो च्याम्पियनसिप, ९औँ एसियन पुम्से तेक्वान्दो च्याम्पियनसिप, ११औँ एसियन पारा तेक्वान्दो च्याम्पियनसिप तथा आईची-नागोया एसियाली खेलकुदको छनोट प्रतियोगितामा पनि उनले निर्णायकको भूमिका निर्वाह गरेका थिए।
शिवाकोटीले सन् २०२५ डिसेम्बरमा दक्षिण कोरियाको सियोलस्थित कोरिया नेसनल स्पोर्ट्स एकेडेमीमा आयोजना भएको एटियू रेफ्री एजुकेसन कोर्स २०२६ मा पनि छनोट भई सहभागिता जनाएका थिए। एसियाका ४० राष्ट्रका करिब एक सय रेफ्री सहभागी उक्त प्रशिक्षणमा विश्व तेक्वान्दोले परिमार्जन गरेका नयाँ नियमबारे प्रशिक्षण दिइएको थियो। ती नियम सन् २०२६ जुन १ देखि लागू भएका छन् र एसियाली क्षेत्रमा आयोजना हुने प्रतियोगितामा प्रयोग हुँदै आएका छन्।
उनको प्राविधिक दक्षतालाई थप जिम्मेवारी दिँदै एसियन तेक्वान्दो युनियन (एटियू) ले शिवाकोटीलाई सन् २०२६ का लागि आफ्नो टेक्निकल कमिटी सदस्यमा नियुक्त गरेको छ। ATU को टेक्निकल कमिटीमा उनको नियुक्तिले नेपाली तेक्वान्दोको प्राविधिक जनशक्तिको अन्तर्राष्ट्रिय पहुँच र विश्वसनीयता समेत बढाएको छ।
नेपाल तेक्वान्दो संघका केन्द्रीय सदस्यका रूपमा प्रशासनिक तथा प्राविधिक जिम्मेवारी समेत सम्हालिरहेका शिवाकोटीले नेपालमा रेफ्री विकासका गतिविधिमा पनि सक्रिय भूमिका खेल्दै आएका छन्। राष्ट्रिय निर्णायकका लागि रिफ्रेसर कोर्स तथा प्राविधिक प्रशिक्षण सञ्चालनमा उनको सहभागिता रहँदै आएको छ। अब नागोयामा हुने २०औँ एसियाली खेलकुदमा नेपाली खेलाडीहरूको प्रदर्शनसँगै नेपाली प्राविधिकको उपस्थितिले पनि अन्तर्राष्ट्रिय मञ्चमा नेपालको प्रतिनिधित्व गर्नेछ। एसियाली खेलकुदको तेक्वान्दो म्याटमा निष्पक्ष निर्णय गर्दै नेपालको प्रतिष्ठा थप उच्च बनाउने जिम्मेवारी शिवाकोटीको काँधमा छ।
