काठमाडौं, नेपाल: एभरेस्ट महिला भलिबल लिग (EWV) ले तेस्रो संस्करणका लागि नयाँ फ्रेन्चाइज टोली
सुदूरपश्चिम रोयल वारियर्स को औपचारिक घोषणा गरेको छ।
सुदूरपश्चिम रोयल वारियर्सको सहभागिताले नेपालमा व्यावसायिक महिला भलिबलको राष्ट्रिय पहुँचलाई थप
विस्तार गर्न महत्वपूर्ण योगदान पुर्याउने अपेक्षा गरिएको छ। यस फ्रेन्चाइजको स्वामित्व श्रीमती उमा गौतम
भण्डारी, श्री सञ्जीप शाही र श्री कुमार भण्डारीको रहेको छ।
फ्रेन्चाइजले सुदूरपश्चिमको प्रतिभा, भलिबलप्रतिको उत्साह र खेलकुद क्षमतालाई प्रतिनिधित्व गर्दै यस क्षेत्रका
ग्रामीण, दुर्गम तथा अवसरबाट वञ्चित समुदायका महिला खेलाडीहरूका लागि थप अवसर सिर्जना गर्ने लक्ष्य
राखेको छ।
फ्रेन्चाइज स्वामित्व समूहका तर्फबाट श्री सञ्जीप शाही:“भलिबलप्रतिको अपार प्रतिभा र उत्साह हुँदाहुँदै पनि
सुदूरपश्चिमले नेपालको महिला भलिबल लिगमा हालसम्म आफ्नै फ्रेन्चाइज टोलीमार्फत प्रतिनिधित्व गर्न पाएको
थिएन। सुदूरपश्चिम रोयल वारियर्समार्फत हामी यसलाई परिवर्तन गर्न चाहन्छौँ, ग्रामीण तथा दुर्गम क्षेत्रका
प्रतिभाशाली महिला खेलाडी पहिचान र विकास गर्दै उनीहरूलाई व्यावसायिक मञ्च र राष्ट्रिय स्तरसम्म पुग्ने
अवसर प्रदान गर्ने हाम्रो लक्ष्य हो। सुदूरपश्चिमको शक्ति र पहिचानलाई प्रतिनिधित्व गर्ने टोली निर्माण गर्दै युवा
महिलाका लागि भलिबलमार्फत अर्थपूर्ण अवसर सिर्जना गर्नु हाम्रो उद्देश्य हो।”
स्नेभी चापागाईं, प्रमुख कार्यकारी अधिकृत, एभरेस्ट महिला भलिबल लिग: EWV को तेस्रो संस्करणमा
सुदूरपश्चिम रोयल वारियर्सलाई स्वागत गर्न पाउँदा हामी अत्यन्तै गौरवान्वित छौँ। EWV को सुरुवातदेखि नै
सुदूरपश्चिमका उत्साही भलिबलप्रेमी दर्शकमाझ पुग्ने र यस क्षेत्रमा भलिबल खेलको विकासमा रहेको महत्वपूर्ण
योगदानलाई सम्मान गर्दै यस क्षेत्रलाई लिगसँग जोड्ने हाम्रो परिकल्पना रहँदै आएको छ। अब उत्साही र
प्रतिबद्ध स्वामित्व समूहको आगमनसँगै EWV को राष्ट्रिय उपस्थितिलाई अझ सुदृढ गर्दै सुदूरपश्चिमलाई
नेपालको राष्ट्रिय खेलसँग अझ मजबुत रूपमा जोड्ने दिशामा हामी अघि बढ्नेछौँ।
एभरेस्ट महिला भलिबल लिग अझ प्रभावकारी रूपमा पुनरागमनको तयारीमा रहेको छ, र आगामी दिनमा थप
महत्वपूर्ण तथा रोमाञ्चक घोषणाहरू सार्वजनिक गरिनेछन्। निरन्तर साथ, सहयोग र समर्थनका लागि सम्पूर्ण
सञ्चारकर्मी मित्रहरूप्रति हामी हार्दिक आभार व्यक्त गर्दछौँ। लिगसम्बन्धी थप जानकारी तथा घोषणाका लागि
हाम्रा आधिकारिक सामाजिक सञ्जालहरूमा जोडिनुहुन अनुरोध गर्दछौँ।
