हिंसाबाट बालबालिकाको सुरक्षा सुनिश्चित गर्न सिजपको आग्रह

श्रावण १४ गते, बालबालिका शान्तिक्षेत्र राष्ट्रिय अभियान (सिजप) ले सुनसरी,सिरहा लगायत तराइ क्षेत्रको विभिन्न ठाउँमा भएको हिंसात्मक घटनापछि विद्यालय बन्द हुनुपरेको र आज सिराहामा भएको झडपका क्रममा अन्दाजी १८ वर्षीय बालकको गोली लागेर मृत्यु भएको घटनाप्रति गहिरो दुःख र चिन्ता व्यक्त गर्दछ। विभिन्न जिल्लामा भएका हिंसात्मक घटनामा ज्यान गुमाएकाहरूप्रति बालबालिका शान्तिक्षेत्र राष्ट्रिय अभियान (सिजप) भावपूर्ण श्रद्धाञ्जली अर्पण गर्दै शोकाकुल परिवारप्रति गहिरो समवेदना व्यक्त गर्दछ। साथै, घाइतेहरूको शीघ्र स्वास्थ्यलाभको कामना गर्दै उनीहरूलाई आवश्यक उपचार, संरक्षण र सहयोगको व्यवस्था गर्न सम्बन्धित सबै पक्षसँग आग्रह गर्दछ।यस्ता घटनाहरुमा बालबालिकाहरु धेरै अग्रपंक्तिमा देखिएका र जोखिममा रहेका छन् तसर्थ कर्फ्यु तथा निषेधाज्ञाको समयमा बालबालिका लाई घरमा सुरक्षित राख्न पनि सबै अभिभावकमा अपिल गर्दछौं ।
नेपालको संविधान, २०७२ बालबालिका सम्बन्धी ऐन, २०७५ तथा बालअधिकार सम्बन्धी संयुक्त राष्ट्रसंघीय महासन्धि लगायतका कानुनले प्रत्येक बालबालिकाको जीवन, सुरक्षा, शिक्षा र विकासको अधिकार सुनिश्चित गरेकाले कुनै पनि प्रकारको राजनीतिक, सामाजिक, सामुदायिक द्वन्द्वका कारण बालबालिकाले आफ्नो मौलिक अधिकारबाट वञ्चित हुनुपर्ने अवस्था स्वीकार्य हुन सक्दैन।
यस सन्दर्भमा सिजप नेपाल सरकार, प्रदेश सरकार,  राजनीतिक दल, सुरक्षा निकाय, स्थानीय सरकार, नागरिक समाज, समुदाय तथा सबै सरोकारवालासँग सबै प्रकारका हिंसाका गतिविधि तत्काल रोक्न, विद्यालयहरूलाई सुरक्षित र नियमित सञ्चालन हुने वातावरण सुनिश्चित गर्न, बालबालिकालाई कुनै पनि प्रकारको हिंसा, द्वन्द्व र राजनीतिक प्रयोगबाट टाढा राख्न, घटनाहरूको निष्पक्ष छानबिन गरी दोषीलाइ कारबाही गर्न, प्रभावित बालबालिका र परिवारलाई मनोसामाजिक सहयोग तथा आवश्यक संरक्षण सेवा उपलब्ध गराउन हार्दिक आग्रह गर्दछ।
साथै, राष्ट्रिय मानव अधिकार आयोग, अन्य संवैधानिक निकायहरू तथा सम्बन्धित सरोकारवाला निकायहरूलाई घटनाको शीघ्र अनुगमन, तथ्यपरक छानबिन तथा बालअधिकार संरक्षणका लागि आवश्यक पहल गर्न हार्दिक अनुरोध गर्दछ।
विद्यालय, सार्वजनिक स्थान र समुदायलाई बालबालिकाका लागि सुरक्षित र शान्तिक्षेत्रका रूपमा कायम राख्नु राज्य, राजनीतिक दल, सुरक्षा निकाय, समुदाय र सबै सरोकारवालाको साझा दायित्व हो। यस दायित्वप्रति प्रतिबद्ध रहँदै बालबालिका शान्तिक्षेत्र राष्ट्रिय अभियान (सिजप) सबै पक्षलाई बालबालिकाको सर्वोत्तम हितलाई केन्द्रमा राखी संयम, संवाद र शान्तिपूर्ण उपाय अपनाउन हार्दिक आह्वान गर्दछ।