काठमाडौं । अटोमोबाइल व्यवसायीहरूको छाता संगठन नाडा अटोमोबाइल्स एसोसिएसन अफ नेपाल अब ‘नाडा अटोमोबाइल्स महासंघ नेपाल’ मा रूपान्तरण हुने भएको छ।
डेढ दशक लामो प्रतीक्षापछि नाडाले विधानतः महासंघमा जाने ऐतिहासिक निर्णय लिएको हो।
नाडाले आयोजना गरेको १७औं संस्करणको नाडा अटो शो को समापनको दिन (भदौ ८ गते) बसेको नाडाको २१औं केन्द्रीय कार्यसमितिको बैठकले महासंघमा रूपान्तरण गर्ने प्रस्ताव पारित गरेको हो।
सोही निर्णय कार्यान्वयन गर्न आगामी भदौ २४ गते, मङ्गलबार बिहान ११ः०० बजे, द प्लाजा, झम्सिखेल, ललितपुरमा विशेष साधारण सभा बोलाइएको नाडाले जनाएको छ।
नाडाले यस कदमलाई आफ्नो स्वर्ण जयन्ती वर्षतर्फको ऐतिहासिक तयारीका रूपमा लिएको छ। विशेष साधारणसभामा उक्त प्रस्ताव पारित गरी विधिवत रूपमा महासंघमा रूपान्तरण प्रक्रिया सुरु गरिनेछ।
नाडाका पदाधिकारीहरूका अनुसार, महासंघमा रूपान्तरणसँगै नाडा अझ व्यवस्थित, प्रभावकारी र राष्ट्रियस्तरको संस्था बन्नेछ। यसले नाडाका सदस्यहरूको हकहित र व्यवसायिक अधिकार संरक्षण गर्न थप बल पुग्नेछ।
