काठमाडौँ / सन् २०२५ को अगस्ट महिनामा ८८ हजार ६८० पर्यटक नेपाल आएका छन्। नेपाल पर्यटन बोर्डले सोमबार सार्वजनिक गरेको तथ्याङ्क अनुसार गत वर्षको तुलनामा यस वर्ष अगस्टमा २२ प्रतिशतले पर्यटकको सङ्ख्यामा बृद्धि भएको हो ।
बोर्डको तथ्याङ्कअनुसार भारतबाट मात्रै ३५ हजार ५०५ अर्थात् कुलको ४० प्रतिशत पर्यटक आएका छन् ।
यसैगरी, चीनबाट ७ हजार ५३३ (८.५ प्रतिशत), अमेरिकाबाट ६ हजार ६८ (६.८ प्रतिशतं, श्रीलंकाबाट ५ हजार ९५६ (६.७ प्रतिशत) र बंगलादेशबाट ४ हजार २६२ (४.८ प्रतिशत) पर्यटक आएका छन्।
सन् २०२५ को जनवरीदेखि अगस्तसम्मको ८ महिनामा जम्मा ७ लाख ३६ हजार ५६२ पर्यटक भित्रिएका छन्। क्षेत्रगत हिसाबले हेर्दा दक्षिण एसियाली (सार्क) मुलुकबाट ४७ हजार १३७ अर्थात् ५३ प्रतिशत पर्यटक आएका छन् भने एसियाका अन्य मुलुकबाट १५ हजार ७७७ (१७.८ प्रतिशत), युरोपबाट ११ हजार १३२ (१२.६ प्रतिशत) र ओसनियाबाट २ हजार ४३५ (२.७ प्रतिशत) पर्यटक आएका छन्।
त्यस्तै, अमेरिकाबाट ७ हजार २९३ (८.२ प्रतिशत), मध्यपूर्वबाट ९४४ (१.१ प्रतिशत), अफ्रिकाबाट ३२२ (०.४ प्रतिशत) र अन्य मुलुकबाट ३ हजार ६४० (४.१ प्रतिशत) पर्यटक आएका छन्। यसअघि सन् २०२५ को जुलाईमा ७० हजार १९३ पर्यटक नेपाल आएका थिए।
पर्यटन बोर्डका प्रमुख कार्यकारी अधिकृत दीपक राज जोशीले कोरोना महामारीले थला परेको नेपालको पर्यटन क्षेत्र क्रमशः पुनरुत्थानको चरणमा रहेको बताएका छन्।
उनका अनुसार भारतबाट एयर इण्डिया एक्सप्रेसको उडान थपिँदा पनि भारतबाट आउने पर्यटकको संख्यामा उल्लेख्य वृद्धि भएको हो। उनले आगामी दिनमा निरन्तर पर्यटक आगमन बढ्नेमा आशावादी रहेको बताएका छन्।
