चैत २९ , काठमाडौं । वरिष्ठ संगीतकार, गायक तथा शिक्षक भिमबिराग अधिकारीको चैत २७ गते काठमाडौंमा निधन भएको छ ।
इलाममा जन्मिएका अधिकारीले ४०को दशकमा रेडियो नेपालमा रहेर नेपाली गीतसंगीतको क्षेत्रमा महत्वपूर्ण योगदान गर्नुभएकाे थियाे । उहाँले आफ्नै शब्द र संगीतमा गाउनुभएको ‘बिदाको बेलामा’ बोलको गीत चर्चित रहेको छ । उहाँले आधुनिक तथा लोकगीतमा संगीत भर्नुभएको छ ।
५०को दशकमा दुर्घटनामा परी अशक्त भएपछि उहाँको जीवनले बेग्लै मोड लिन पुग्यो । आर्थिक अभावका बीच जीवन निर्वाहका लागि काठमाडौं, भक्तपुर र सिन्धुलीका विभिन्न विद्यालयमा शिक्षकका रुपमा सक्रिय रहनुभयो ।
उच्च रक्तचापका कारण मस्तिष्कघात भई बेहोस हुनभएका भिमबिराग अधिकारीको उपचारका क्रममा अन्नपूर्ण न्यूरो अस्पतालमा चैत २७ गते मृत्यु भयो । उहाँका ३ छोरा, १ छोरी र श्रीमती हुनुहुन्छ ।
