काठमाडौं । संसदबाट महाअभियोग प्रस्ताव दर्ता पछि निलम्वनमा रहेका सर्वोच्च अदालतका प्रधान न्यायधीश चोलेन्द्रशमशेर जबराले आफुमाथि लागेको आरोप पुष्टि हुननसकेको भन्दै आजदेखि कार्यालय जाने जबराकाे आजकाे याेजनालाइ सरकारले असफल पारिदिएकाे छ ।
प्रधानन्यायधीश निवासको गेटमा विहान देखि धेरै संख्यामा सुरक्षा तैनाथ गरिएको थियो । निवास प्रवेश गर्ने र बाहिर निस्कने सवारी साधनमा सवार व्यक्तिको विवरण लिएर मात्र जाने व्यवस्था मिलाइएको थियो ।
त्यस्तै बार एशोसिएशनले जबराको आगमन रोक्न विहानदेखि विरोधका कार्यक्रम राखेको थियो ।
केही सञ्चारमाध्यमले न्यायधीश जवरालाई सरकारले नजरबन्दमा राखेको भन्नेखालका समाचार सम्प्रेशण गरेपछि राष्ट्रिय मानवअिधकार आयोगको प्रतिनिधि प्रधान न्यायधीश निवास गएका थिए ।
आयोगले महाअभियोग प्रकरणमा सर्वोच्च अदालतमा देखिएको गतिरोधको विषयमा ध्यानाकर्षण भएको जनाएको छ । प्रधान न्यायधीश राणाले सर्वोच्चमा वहाली गर्न जाने तयारी गर्दा सुरक्षाकर्मीले विनाकारण निवासबाट बाहिर निस्कन नदिएको जानकारी प्राप्त भएको आयोगले जनाएको छ । कुनैपनि व्यक्तिको वैयक्तिक स्वतन्त्रता, आवतजावतको स्वतन्त्रता र गोपनियताको अधिकारको सम्मान गर्नु राज्यको दायीत्व हुने भन्दै यसकिसिमको गतिरोध अन्त्य गर्न आयोगले सम्बद्ध सबै पक्षलाई आग्रह गरेको छ ।
प्रमुख प्रतिपक्ष दलका नेता तथा नेकपा एमालेका अध्यक्ष केपी ओलीले यस विषयलाई सरकारले प्रहरी सेना हतमा लिएर घर घेर्ने, नजरबन्दमा राखेर तमासा गरेको भनेका छन् ।
वरिष्ठ अधिवक्ता तथा नेपाल बार एशोसिएशनका पूर्वअध्यक्ष चण्डेश्वर श्रेष्ठले निलम्बित प्रधानन्यायाधीश चोलेन्द्रशमशेर जबरा प्रतिनिधिसभाले महाअभियोगको टुंगो नलागेसम्म सर्वोच्च अदालतमा काममा फर्कन नमिल्ने बताए ।
प्रतिनिधिसभाको कार्यकाल सकिएसँगै जबरा काममा फर्कने तयारीको चर्चा भईरहेका बेला आइतबार सर्वोच्च अदालतको मूलगेटमा पुगेका उनले संविधान र कानुनअनुसार प्रतिनिधिसभाले सो महाअभियोगको टुंगो नलगाएसम्म महाअभियुक्तको रूपमा रहेका जबराले सर्वोच्च अदालतको काममा फर्कन नमिल्ने बताएका छन् ।
यस्तै, जबराकी छोरीले आफुहरुलाई सरकारले नजरबन्दमा राखेको भन्दै जिवन रक्षाका लागि जनतालाई साथ दिन आग्रह गरेकी छिन ।
निलम्बित प्रधानन्यायाधीश जबराले आफूमाथि प्रतिनिधिसभामा लगाइएको महाभियोग पुष्टि नभएको भन्दै आज ९ (आइतबार) बिहान १० बजे सर्वोच्च अदालतमा काममा फर्कने तयारी गरेका थिए । तर, सरकारले सर्वोच्च जाने आजको योजना असफल तुल्याइदिएको छ ।
यस्तै सरकारले निलम्बित प्रधान न्यायाधीश चोलेन्द्र शमशेर जबराको सुरक्षामा खटिएका सुरक्षाकर्मीलाई फिर्ता बोलाएको रातोपाटी डटकमले जनाएको छ । उक्त अनलाइनका अनुसार प्रहरी प्रधान कार्यालयले अगुवा गाडीसहितका सुरक्षाकर्मीहरुलाई फिर्ता गर्ने निर्णय गरेको हो ।
संसदमा महाअभियोग प्रस्ताव दर्ता भएसँगै उनको सुरक्षामा प्रहरी नायव निरीक्षक (सई)को कमाण्डमा ९ जना सुरक्षाकर्मी खटिएका थिए । जबराको सुरक्षामा अगुवा गाडी पनि दिइएको थियो । गाडीसहितका सुरक्षा अधिकारीलाई फिर्ता बोलाइएको प्रहरी प्रधान कार्यालयका एकजना उच्च अधिकारीले बताए ।
