काठमाडौं । सत्ता गठबन्धनका प्रमुख दल नेकपा एमाले र नेपाली कांग्रेसबीच गभर्नर नियुक्तिमा सहमति जुटेको छ ।
प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाले नेपाल राष्ट्र बैंकको गभर्नर डा.गुणाकर भट्टलाई बनाउन सहमति जुटेको हो।
गभर्नर नियुक्तको विषयमा सहमति नहुदाँ सरकारको क्षमतामाथि नै प्रश्न उठाएको नेपाली कांग्रेसले हाल नेपाल राष्ट्र बैंकको कार्यकारी निर्देशक रहेका भट्टलाई गभर्नर बनाउन कांग्रेस सभापति देउवाले समर्थन गरेको र त्यसमा प्रधानमन्त्री ओलीले समर्थन गरेको जनाइएको छ ।
गभर्नर बन्ने दौडमा रहेका अन्य पाँच जनालाई पछि पार्दै कांग्रेसकाे प्रस्तावमा भट्टले बाजी मार्ने निश्चित भएको हो।
बुधबार साँझ प्रधानमन्त्री निवास बालुवाटारमा उच्चस्तरीय राजनीतिक संयन्त्रको बैठकअघि प्रधानमन्त्री ओली र सभापति देउवाबीचको छलफलमा भट्टलाई गभर्नर बनाउने सहमति जुटेका एक नेताले बताए ।
यद्यपि, भट्टसहित तीन जनाको नाम अर्थमन्त्री विष्णु पौडेल नेतृत्वको सिफारिस समितिले मन्त्रिपरिषद्मा पेस गरेपछि गभर्नर नियुक्तिको औपचारिक निर्णय हुनेछ।
समितिका सदस्य डा विश्व पौडेल भारत भ्रमणमा छन् र उनी शनिबार मात्रै स्वदेश फर्कने कार्यक्रम छ। त्यसैले सम्भवतः सोमबार मन्त्रिपरिषद्को बैठकमा अर्थमन्त्रीले गभर्नरका लागि तीन जनाको नाम प्रस्ताव गर्नेछन्। र, सोही बैठकले भट्टलाई नियुक्त गर्नेछ।
