काठमाडौं — विकास हाइड्रोपावर कम्पनी लिमिटेडको पाँचौँ वार्षिक साधारण सभा सम्पन्न भएको छ। कम्पनीको सभा काठमाडौंको धुम्बाराहीस्थित होटल स्मार्ट दरबार प्रा.लि.मा सम्पन्न भएको हो।
सभाले आर्थिक वर्ष २०८२/८३ को वार्षिक प्रतिवेदन, लेखापरीक्षकको प्रतिवेदन तथा कम्पनीको वित्तीय विवरणमाथि छलफल गरी पारित गरेको छ। साथै, सञ्चालक समितिले प्रस्ताव गरेका लाभांश वितरण, पुँजी वृद्धि तथा अन्य महत्त्वपूर्ण प्रस्तावहरूलाई समेत सर्वसम्मत स्वीकृति प्रदान गरेको छ।
सभाले कम्पनीको हाल कायम चुक्ता पुँजी ९० करोड ९१ लाख ९ हजार ३०० रुपैयाँको १० प्रतिशतका दरले ९ करोड ९ लाख १० हजार १३० रुपैयाँ बराबरको बोनस सेयर वितरण गर्ने प्रस्ताव पारित गरेको छ।
यसैगरी, बोनस सेयरमा लाग्ने कर प्रयोजनका लागि ०.५२६३ प्रतिशतका दरले ४७ लाख ६४ हजार ६०० रुपैयाँ १४ पैसा नगद लाभांश वितरण गर्ने प्रस्तावसमेत पारित भएको छ।
बोनस सेयर वितरणपश्चात् कम्पनीको अधिकृत, जारी तथा चुक्ता पुँजी वृद्धि गर्ने प्रस्ताव सभाले स्वीकृत गरेको छ। यसका साथै कम्पनीको प्रबन्धपत्र तथा नियमावलीमा आवश्यक संशोधन गर्ने र नियमनकारी निकायबाट कुनै सुझाव वा संशोधन प्राप्त भएमा सोहीअनुसार समायोजन गर्न सञ्चालक समितिलाई पूर्ण अख्तियारी प्रदान गरिएको छ।
सभाले आर्थिक वर्ष २०८३/८४ का लागि नयाँ लेखापरीक्षक नियुक्त गर्ने र निजको पारिश्रमिक निर्धारण गर्ने प्रस्ताव पनि पारित गरेको छ।
साधारण सभा तथा लाभांश प्रयोजनका लागि कम्पनीले असोज १९ गते सेयरधनी दर्ता पुस्तिका बन्द (बुकक्लोज) गरेको थियो। जसअनुसार असोज १८ गतेसम्म नेपाल स्टक एक्सचेन्ज (नेप्से) मा सेयर कारोबार भई कायम रहेका सेयरधनीहरू मात्र यो लाभांश प्राप्त गर्न योग्य भएका छन्। पारित प्रस्तावअनुसार अब बोनस सेयर वितरण र पुँजी संरचना वृद्धिको प्रक्रिया अघि बढाइनेछ।
