काठमाडौं, असार १३ गते । नाडा अटोमोबाइल्स एशोसिएशन अफ नेपालको ऐतिहासिक ५०औं वर्ष प्रवेशको शुभ अवसरमा आयोजित ‘स्वर्ण उत्सव उद्घाटन समारोह’ राजधानीमा भव्यताका साथ सम्पन्न भएको छ। नेपाल उद्योग वाणिज्य महासंघका अध्यक्ष अन्जन श्रेष्ठको प्रमुख आतिथ्यता तथा नाडाका अध्यक्ष सुरेन्द्रकुमार उप्रेतीको सभापतित्वमा उक्त विशेष समारोह आयोजना गरिएको हो।
वि.सं. २०३२ सालमा स्वर्गीय तोलाराम दुगडद्वारा काठमाडौंमा स्थापना भएको नाडाले आफ्नो स्थापनाको ५० वर्ष पुगेको अवसरमा विभिन्न सिर्जनात्मक कार्यक्रमहरू सहित ऐतिहासिक स्वर्ण उत्सव मनाउन लागेको हो
स्वर्ण उत्सवलाई अविस्मरणीय र उत्सवमय बनाउन नाडाले त्रिपुरेश्वरस्थित दशरथ रंगशालादेखि दरबारमार्गको होटल याक एण्ड यतीसम्म विशेष ‘वाकाथन’ (प्रभातफेरी) को आयोजना गरेको थियो। उक्त वाकाथनमा देशका विभिन्न विशिष्ट व्यक्तित्वहरू, नाडा केन्द्रीय कार्यसमितिका पदाधिकारी तथा सदस्यहरू, नाडाका पूर्व अध्यक्षहरू, सम्पूर्ण सदस्य कम्पनीका प्रतिनिधिहरू र पत्रकारहरूको उत्साहजनक सहभागिता रहेको थियो। यसै ऐतिहासिक मोडमा नाडाले संस्थाको विकासमा अतुलनीय योगदान पुर्याउने आफ्ना पूर्व अध्यक्षहरूलाई विशेष सम्मान समेत गरेको छ।
यो स्वर्ण उत्सव समारोह आज असार १३ गतेदेखि १९ गतेसम्म साताव्यापी रूपमा राजधानी काठमाडौंका साथै देशका सातै वटा प्रदेशहरूमा विभिन्न कार्यक्रमहरूका साथ भव्य रूपमा मनाइने नाडाले जनाएको छ।
यस ५० वर्षको व्यावसायिक यात्रामा नाडाले गम्भीर आर्थिक तथा नीतिगत उतारचढावहरू पार गर्दै देशको अर्थतन्त्रमा बलियो खम्बाको रूपमा आफूलाई स्थापित गरेको छ। संस्थाले हालसम्म हासिल गरेका प्रमुख उपलब्धिहरू यस प्रकार छन्:
- कुशल नेतृत्व र अधिवेशन: नाडाले हालसम्म २३ वटा अधिवेशनहरू सफलतापूर्वक सम्पन्न गरिसकेको छ भने हालसम्म २१ जना अध्यक्षहरूले संस्थाको सफल नेतृत्व सम्हालिसकेका छन्।
- नियमित प्रकाशनहरू: संस्थाले आफ्नो वार्षिक व्यावसायिक प्रकाशनको रूपमा ३६औं संस्करणको ‘नाडा अटोमोबाइल ट्रेड डाइरेक्टरी’ र ५१औं संस्करणको ‘नाडा अटो न्यूज’ प्रकाशित गरिसकेको छ। यस्तै, हालसम्म १८औं संस्करणको ‘नाडा अटो ड्राइभ क्यालेन्डर’ समेत सार्वजनिक भइसकेको छ।
- आगामी नाडा अटो शो: अटो बजारको बहुप्रतिक्षित कुम्भमेला, १८औं संस्करणको ‘नाडा अटो शो’ यही आगामी भदौ महिनामा आयोजना गर्ने अन्तिम तयारी भइरहेको छ।
- उत्कृष्टताको पहिचान: नेपाल उद्योग वाणिज्य महासंघमा आवद्ध वस्तुगत संघहरूमध्ये नाडाले आफ्नो उत्कृष्ट कार्यसम्पादनका कारण महासंघबाट पटक-पटक ‘उत्कृष्ट वस्तुगत एशोसिएशन’ को पुरस्कार प्राप्त गर्न सफल भएको छ।
- अन्तर्राष्ट्रिय मापदण्ड: नाडा सन् २०१५ देखि नै ISO 9001:2015 QMS प्रमाणित संस्थाको रूपमा स्थापित रहँदै आएको छ।
- सामाजिक उत्तरदायित्व (CSR): व्यावसायिक हितका अतिरिक्त नाडाले देशव्यापी रूपमा विभिन्न सामाजिक महत्त्वका कार्यक्रमहरू सञ्चालन गर्नुका साथै राष्ट्रिय विपत्तिहरूका समयमा अग्रपंक्तिमा रहेर सहयोगी भूमिका निर्वाह गर्दै आएको छ।
उक्त भव्य स्वर्ण उत्सव महोत्सव कार्यक्रमको सफलतापूर्वक संयोजन तथा धन्यवाद ज्ञापन नाडाका उपाध्यक्ष विक्रम सिंहानियाले गर्नुभएको थियो भने कार्यक्रमको औपचारित सञ्चालन नाडाका महासचिव मिलनबाबु मल्लले गर्नुभएको थियो।
