का.वा. अध्यक्ष मल्होत्रा र राजदूतद्धयबाट साउथ एसिया ट्रेड फेयर २०२६ को समुुद्घाटन

काठमाडौं । “साउथ एसिया ट्रेड फेयर २०२६” बिहीवारदेखि शुरु भएको छ । राजधानीको प्रदर्शनीमार्गस्थित भृकुटीमण्डप प्रदर्शनी हलमा शुरु भएको सार्कस्तरीय यस अन्तर्राष्ट्रिय व्यापार मेलाको समुुद्घाटन नेपाल चेम्बर अफ कमर्सका कार्यवाहक अध्यक्ष दिपक मल्होत्रा, नेपालका लागि बंगलादेशका राजदूत सफिक्वयर रहमान र श्रीलंकाका राजदूत रुवान्थी डेल्पिटियाले संयुक्त रुपमा गर्नुभयो । मेलाको उद्घाटन लगत्तै उहाँहरुले स्टलहरुको अवलोकन गर्नुभएको थियो ।
सो अवसरमा चेम्बर अफ कमर्सका कार्यवाहक अध्यक्ष दिपक मल्होत्राले देशभित्र लामो समयदेखि सुस्त रहेको व्यापारिक वातावरण र लगानीगत अनिश्चितताबीच यो मेला निजी क्षेत्रका लागि पुनः सक्रिय हुने प्लेटफर्म बन्ने अपेक्षा गरिएको बताउनुभयो ।
इन्ट्रोडक्शन ट्रेड शोज नेपाल प्रा.लि.को तत्वावधानमा आयोजित यस मेलामा नेपालसहित बङ्गलादेश, भुटान, भारत, श्रीलंका लगायतका देशका करिब १५० प्रदर्शकहरू सहभागी रहेको यस मेलामा कपडा तथा रेडिमेड सामग्री, सौन्दर्य सामग्री, हस्तकला, सवारी साधन तथा पार्टपुर्जा, फर्निचर, कृषि उत्पादन, सूचना प्रविधि, घरेलु उपकरण लगायतका विभिन्न क्षेत्रका उत्पादन तथा सेवाहरू आदी सामग्रीहरू बिक्रीका लागि राखिएको छ । साथै, व्यापारिक भेटघाट, फुड फेष्टिवल, रक्तदान कार्यक्रम तथा मनोरञ्जनात्मक गतिविधिहरू समेत सञ्चालन गरिएको उहाँले जानकारी दिनुभयो ।
उत्पादन तथा सेवाको प्रवद्र्धन, बजार सम्भाव्यता अध्ययन तथा क्रेता–बिक्रेता बीच सहकार्य विस्तार गर्ने उदेश्यसहित आयोजित यस मेलाले विभिन्न देशबीच व्यापारिक सम्बन्धलाई अझ मजबुत बनाउने मेला संयोजक सुमन महर्जनले बताउनुभयो । उहाँका अनुसार मेलामा झण्डै एक लाख स्थानीय अवलोकनकर्ता तथा पाँच हजार अन्तर्राष्ट्रिय तथा व्यावसायिक प्रतिनिधिहरूको उपस्थिति रहने अनुमान गरिएको छ ।
यस मेलामा बङ्गलादेशको उद्योग मन्त्रालय तथा एक्सपोर्ट प्रोमोसन ब्यूरो (इपीबी), नेपाल चेम्बर अफ कमर्स आदीको सहकार्य रहेका छ भने ईष्डोर्स पार्टनरमा भुटान सरकारको उद्योग, वाणिज्य तथा रोजगारी मन्त्रालय रहेको छ । ५ दिनसम्म चल्ने यस मेला वैशाख २८ गते समापन हुनेछ ।