चैत २६, सिन्धुलीमाढी । सिन्धुली सदरमुकामस्थित सिन्धुलीमाढीमा रहेको बसपार्कमा प्रतिक्षालय नहुँदा यात्रुले समस्या झेल्दै आएका छन् ।
सिन्धुलीमाढीमा रहेको बसपार्क सदरमुकामकै एकमात्र बसपार्क हो । यहाबाट अटो, ईभि , सानाठुला सवारी साधनहरु देशका विभिन्न भाग र स्थानका लागि छुट्ने गर्दछन् । यहाँ ईभि गाडिको चार्जिङ स्टेशन समेत रहेको छ ।
महेन्द्रझाडी जानका लागि बस पर्खिरहेका विकास तामाङ भन्छन् ‘ बस छुट्ने कतिबेला हो, ? प्रतिक्षालय भए बस नआउञ्जेल केहीबेर सुस्ताउन हुन्थ्यो, छैन । अब हुटेलतिर गएर चिया खादै बस्छु । ‘
रास्वपा जिल्ला सचिव सुरज देवकोटा भन्छन् ‘ बिहान ४ बजेबाट बेलुका अबेरसम्म यो बसपार्क व्यस्त रहन्छ । रातिसम्म व्यस्त रहने बसपार्कमा यात्रुको लागि एउटा पनि यात्रु प्रतिक्षालय छैन । ’
विभिन्न स्थामा जाने यात्रुहरुले सवारी साधन पर्खनुपर्दा घाम पानीमा नजिकैका पसलमा ओत लाग्नुपर्ने अवस्था रहेको छ । बस, अटो ,ईभिका कर्मचारीहरूलाई पनि थर्काई मार्ने ठाउँसम्म छैन ।
उनले यसबारेमा स्थानीय निकायलाई जानकारी गराएको बताए । जतिसक्दो चाँडो एउटा यात्रु प्रतिक्षालय बन्नेमा आशावदी रहेको उनको भनाइ छ ।
