काठमाडाैं । बंगलादेशमा बिहीबार सम्पन्न आम निर्वाचनमा तारिक रहमानको नेतृत्वमा रहेको बंगलादेश राष्ट्रवादी दल (बीएनपी) ले भारी बहुमतका साथ विजय हासिल गरेको छ।
३०० सदस्यीय संसदमा बीएनपी नेतृत्वको गठबन्धनले २०९ सिट जितेर दुई-तिहाइ बहुमत प्राप्त गरेको छ।
१७ करोड ५० लाख जनसंख्या भएको यस मुस्लिम बहुल राष्ट्रमा हसिना विरोधी आन्दोलनका कारण जनजीवन र तयारी पोसाक जस्ता ठूला उद्योगहरू प्रभावित भएका थिए। यस्तो अवस्थामा आएको यो स्पष्ट चुनावी नतिजालाई देशको स्थायित्वका लागि निकै महत्वपूर्ण मानिएको छ।
अमेरिकी दूतावासले शुक्रबार बिहानै बीएनपीलाई यस ‘ऐतिहासिक’ जितका लागि बधाई दिएकाे छ।
करिब १७ वर्षपछिको पहिलो स्वतन्त्र र निष्पक्ष मानिएको यस निर्वाचनमा ६०.६९ प्रतिशत मतदान भएको थियो।
हसिनाको १५ वर्षे शासनकालमा भएका अघिल्ला तीन निर्वाचनहरू धाँधली र विपक्षीमाथिको दमनका कारण विवादित बनेका थिए। यसपटकको चुनावमा विदेशमा रहेका बंगलादेशी नागरिकहरूले पनि पहिलोपटक मतदान गर्ने अवसर पाएका थिए, जहाँ हुलाक मतपत्रमार्फत ८० प्रतिशतभन्दा बढी सहभागिता देखिएको थियो।
जितको सुनिश्चिततापछि बीएनपीले जनतालाई धन्यवाद दिँदै शुक्रबार देशको कल्याणका लागि विशेष प्रार्थना गर्न आह्वान गरेको छ। पार्टीले एक विज्ञप्ति जारी गर्दै भारी मतले विजयी भए पनि कुनै पनि विजय जुलुस वा र्याली आयोजना नगर्न कार्यकर्ताहरूलाई निर्देशन दिएको छ।
तारिक रहमानको नेतृत्वमा रहेको यस दलले गरिब परिवारलाई आर्थिक सहायता, प्रधानमन्त्रीको कार्यकाल १० वर्षमा सीमित गर्ने, वैदेशिक लगानी भित्र्याउने र भ्रष्टाचार विरोधी नीतिहरू लागू गर्ने प्रतिवद्धता जनाएको छ।
बीएनपीका मुख्य प्रतिद्वन्द्वी मानिएको इस्लामी जमात-ए-इस्लामीले हार स्वीकार गरिसकेको छ। सो पार्टीका प्रमुख शफिकुर रहमानले आफ्नो दलले ५६ सिट मात्र जितेको स्वीकार गर्दै आगामी दिनमा सकारात्मक राजनीतिको भूमिका निर्वाह गर्ने प्रतिबद्धता जनाएका छन्।
अर्कोतर्फ, भारतमा निर्वासनमा रहेकी पूर्व प्रधानमन्त्री शेख हसिनाले भने यो निर्वाचनलाई ‘सुनियोजित प्रहसन’ को संज्ञा दिँदै यसलाई खारेज गर्न माग गरेकी छन्।
