२६ पुस, काठमाडौं ।
राष्ट्रिय स्वतन्त्र पार्टी (रास्वपा) र कुलमान घिसिङ संरक्षित ‘उज्यालो नेपाल पार्टी’ बीचको एकता प्रक्रिया औपचारिक रूपमा भंग भएको छ। दुइ दलबिच सहमती पछि कुलमान पक्ष र रास्वपासँगको एकता प्रयासबाट बाहिरिएको हो।
शनिबारसम्म भएका विभिन्न चरणका छलफलहरू निष्कर्षविहीन भएपछि एकताको सम्भावना टरेको संवाद समितिमा रहेका एक शीर्ष नेताले जानकारी दिए।
किन भयो एकता भंग? रास्वपा स्रोतका अनुसार कुलमान पक्षले पार्टीभित्र शक्तिशाली मर्यादा र पहिचानको माग राखेपछि कुरा बिग्रिएको हो। वार्तामा कुलमान पक्षबाट मुख्यगरी तीनवटा प्रस्ताव आएका थिए:
- पार्टीको वरिष्ठ उपसभापति पद पाउनुपर्ने।
- पार्टीको महामन्त्री पदमा पनि दाबी।
- पार्टीको वर्तमान नाम परिवर्तन गर्नुपर्ने।
रास्वपाका एक नेताले भने, “पूर्वसहमति भन्दा पछि हटेर वरिष्ठ उपसभापति र महामन्त्री पदका साथै पार्टीको नामै परिवर्तन गर्ने प्रस्ताव आएपछि सहमति हुन सकेन। त्यसैले एकता प्रक्रिया भंग भयो।”
बालेनको सक्रियता र कुलमानको राजीनामा यसअघि ऊर्जामन्त्री पदबाट राजीनामा दिएर राजनीतिक सक्रियता बढाएका कुलमानले रास्वपा सभापति रवि लामिछानेसँग पटक-पटक संवाद गरेका थिए। यी छलफलहरूमा काठमाडौं महानगरपालिकाका प्रमुख बालेन शाह समेत सहभागी भई एकताका लागि प्रयास गरेका थिए। तर, पदीय बाँडफाँट र सैद्धान्तिक कुरामा कुरा नमिलेपछि वैकल्पिक शक्तिहरूलाई एउटै केन्द्रमा ल्याउने यो प्रयास असफल हुन पुगेको छ।
