काठमाडाैं । जापानको सेन्दाइमा बस दुर्घटनामा दुई जना नेपाली विद्यार्थीसहित बस चालकको मृत्यु भएको छ । मंगलबार साँझ भएको दुर्घटनामा परी मृत्यु हुनेमा हुनेमा काभ्रेका नवराज तामाङ र युवराज थापा रहेको जापानीज सञ्चारमाध्यमले जनाएका छन् । थापा सेन्मोन गाक्कोउमा अध्ययनरत थिए भने तामाङ निहोनगो गाक्कोउमा अध्ययनरत थिए ।
सेन्दाईबाट इवातेका लागि हिँडेको बसमा समस्या देखा परेपछि मियागी प्रान्तको कुरिहारा सहरको तोहोकु एक्सप्रेसवेमा जाँचका लागि रोकिएको थियो । सोही क्रममा बसलाई पछाडीबाट ट्रकले ठक्कर दिएको हो । बसमा हाकेन कम्पनी मार्फत् काम गर्ने ४० जना नेपाली रहेको बसमा सवार सुमन अर्यालले बजार दैनिकलाई जानकारी दिए ।
‘गाडीको स्टाट बन्द भएपछि बनाउन रोकिएको थियो । सबै विद्यार्थीलाई बसबाट झारिएको थियो । दुई जना नेपाली विद्यार्थीले चालकलाई मोबाइलको लाइट बालेर सहयोग गरिरहेको अवस्थामा ट्रकले ठक्कर दिएको हो’ अर्यालले भने, ‘ट्रकको ठक्कर पछि बस उछिटिएर १ सय मिटर पर पुगेको थियो ।’
दुर्घटनामा परी ट्रकका चालक गम्भिर घाइते भएका छन् ।
