काठमाडौँ। थ्री स्टार हाइड्रोपावर लिमिटेडको नवौँ, दशौँ र एघारौँ वार्षिक साधारण सभा काठमाडौँ को स्मार्ट दरबार प्रा.लि., शंखपार्कमा शेयरधनीहरुको बाक्लो उपस्थितीमा आश्विन २७ गते भब्यरुपमा सम्पन्न भएको छ । वार्षिक साधारण सभाले कम्पनीको सुदृढ वित्तीय अवस्था, वार्षिक प्रतिवेदन, लेखापरीक्षण, सञ्चालक समिति गठन तथा पुँजी संरचनामा व्यापक फेरबदल गर्नेसम्बन्धी महत्त्वपूर्ण प्रस्तावहरू पारित गरेको छ।
कम्पनीले आर्थिक वर्ष २०८०/८१, २०८१/८२ र २०८२/८३ को वार्षिक प्रतिवेदन, वित्तीय विवरण तथा लेखापरीक्षकको प्रतिवेदनमाथि विस्तृत छलफल गर्दै तिनलाई सर्वसम्मतिले स्वीकृति प्रदान गरेको छ। साथै, नयाँ लेखापरीक्षकको नियुक्ति, सञ्चालक समितिको पुनर्गठन तथा सञ्चालक निर्वाचनसम्बन्धी प्रक्रिया पनि सभाले सम्पन्न गरेको छ।
१:१ अनुपातमा हकप्रद शेयर जारी गरिने
साधारण सभाको मुख्य आकर्षण भनेको कम्पनीको पुँजी संरचना पुनर्संरचना गर्ने र १:१ को अनुपातमा (१०० प्रतिशत) हकप्रद शेयर (Right Shares) जारी गर्ने प्रस्ताव हो। उक्त प्रस्ताव पारित भएसँगै हाल कायम रहेका योग्य शेयरधनीहरूले आफूसँग भएको प्रत्येक १ कित्ता शेयर बराबर थप १ कित्ता हकप्रद शेयर खरिद गर्न पाउने बाटो खुलेको छ।
यद्यपि, हकप्रद शेयरको अन्तिम निष्कासन र कार्यान्वयन भने नियामक निकाय (नेपाल धितोपत्र बोर्ड लगायत) को स्वीकृति तथा तोकिएको कानुनी प्रक्रिया पूरा भएपछि मात्र हुनेछ।
प्रबन्धपत्र तथा नियमावली संशोधन र महिला प्रतिनिधित्व सुनिश्चित
सभामा कम्पनीको दर्ता कार्यालयको ठेगाना परिवर्तन, हकप्रद शेयर खरिद/हस्तान्तरण प्रक्रिया तथा प्रबन्धपत्र र नियमावली संशोधनका विषयमा गहन छलफल भएको थियो। नियामक निकायहरूबाट आउने निर्देशन वा आवश्यकताअनुसार प्रबन्धपत्र तथा नियमावलीमा थप संशोधन गर्न सञ्चालक समितिलाई पूर्ण अख्तियारी प्रदान गरिएको छ।
समावेशीता र सुशासनलाई ध्यानमा राख्दै सञ्चालक समितिमा कम्तीमा एक जना महिलाको अनिवार्य प्रतिनिधित्व सुनिश्चित गर्ने विषयलाई पनि सभाले स्वीकृत गरेको छ।
कम्पनीको वित्तीय योजनामा नयाँ आयाम
१:१ अनुपातमा हकप्रद शेयर जारी गर्ने निर्णयले कम्पनीको आगामी वित्तीय योजना, ऋण भुक्तानी तथा पुँजी व्यवस्थापनमा ठूलो सहयोग पुग्ने विश्वास लिइएको छ।
नेपालको जलविद्युत् क्षेत्रमा सक्रिय थ्री स्टार हाइड्रोपावर लिमिटेडको जलविद्युत् आयोजना खोटाङ जिल्लाको हलेसी तुवाचुङ नगरपालिकामा अवस्थित छ। कम्पनी नेपाल स्टक एक्सचेन्ज (NEPSE) मा ‘TSHL’ सिम्बोलअन्तर्गत सूचीकृत भई कारोबार हुँदै आएको छ।
