काठमाडौँ। श्वेत–गंगा हाइड्रोपावर एण्ड कन्स्ट्रक्सन लिमिटेडको १० औं वार्षिक साधारण सभा असोज २७ गते कुण्डलिनी दरबार ब्याङ्क्वेट,चण्डोल, काठमाडौंमा शेयरधनीहरुको बाक्लो उपस्थितिमा कम्पनीका संचालक/अध्यक्ष शिव कुमार बस्नेतको अध्यक्ष्यतामा भब्यरुपमा सम्पन्न भएको छ । श्वेत-गंगा हाइड्रोपावर एण्ड कन्स्ट्रक्सन लिमिटेडले गत आर्थिक वर्ष २०८२/८३ मा उत्कृष्ट वित्तीय कार्यसम्पादन गर्दै १७ करोड ६३ लाख ६७ हजार ९ १४ रुपैयाँ खुद मुनाफा आर्जन गर्न सफल भएको छ। अघिल्लो आर्थिक वर्ष २०८१/८२ को तुलनामा कम्पनीको खुद नाफामा ९७० प्रतिशतले वृद्धि भएको हो।
कम्पनीद्वारा सार्वजनिक गरिएको वार्षिक प्रतिवेदन अनुसार, रामेछाप र ओखलढुङ्गाको सीमानामा बहने लिखु नदीमा निर्मित २८.९ मेगावाट क्षमताको तल्लो लिखु जलविद्युत आयोजनाबाट नियमीत विद्युत् उत्पादन र बिक्री सुचारु भएसँगै आम्दानीमा भारी वृद्धि भएको हो। समीक्षा वर्षमा विद्युत बिक्रीबाट मात्रै ८४ करोड ७० लाख ९५ हजार ४३५ रुपैयाँ आम्दानी भएको छ, जुन अघिल्लो वर्षको तुलनामा ८ प्रतिशतले बढी हो।
प्रमुख वित्तीय उपलब्धिहरू:
- खुद नाफा (Net Profit): रु. १७ करोड ६३ लाख ६७ हजार ९ १४ (९७०% वृद्धि)
- कुल आम्दानी: रु. ७५ करोड ८९ लाख ६१,७७७ (११% वृद्धि)
- प्रतिशेयर आम्दानी (EPS): रु. ११.०७ (अघिल्लो वर्ष रु. ०.११ मात्र रहेको)
- विद्युत विक्री आम्दानी: रु. ८४ करोड ७० लाख ९५,४३५
- ऋण भुक्तानी: साँवा बापत रु. २५ करोड ९१ लाख१९ हजार८१५ र व्याज बापत रु. ३० करोड ८२ लाख २८ हजार२३७ भुक्तानी
कम्पनीका अनुसार नदीको बहाव अनुकुल हुनुका साथै सञ्चालन खर्चमा मितव्ययिता कायम गरिएकाले मुनाफा बढाउन मद्दत पुगेको हो। साथै, बैंक कर्जाको व्याजदरमा आएको गिरावटले समेत कम्पनीको वित्तीय लागत घटाउन महत्वपूर्ण योगदान पुर्याएको छ।
आयोजनाले समीक्षा अवधिमा १४ करोड ३२ लाख ४ हजार ७०७ किलोवाट घण्टा विद्युत् उत्पादन गरी राष्ट्रिय प्रसारण लाइनमा जोडेको छ। वातावरणीय र प्राविधिक चुनौतीहरूका बाबजुद कम्पनीले आफ्ना वित्तीय दायित्वहरू कुशलतापूर्वक पूरा गर्दै लगानीकर्ता तथा शेयरधनीहरूको हितमा निरन्तर प्रगति हासिल गरिरहेको छ।
