काठमाडौँ — यस वर्षको हरितालिका तीज पर्वलाई व्यवस्थित र सुरक्षित रूपमा सम्पन्न गर्न पशुपति क्षेत्र विकास कोषले विशेष तयारी पूरा गरेको छ। २०८३ साल भाद्र २९ गते सोमबारका दिन पर्ने तीजका अवसरमा पशुपतिनाथ मन्दिरमा आउने व्रतालु महिला तथा भक्तजनहरूलाई सहज दर्शन, सुरक्षा, स्वयंसेवा र स्वास्थ्य सेवा उपलब्ध गराउन कोषले आवश्यक व्यवस्थापन गरेको हो।
सुरक्षा निकाय तथा अन्य सम्बन्धित सरोकारवालाहरूसँगको समन्वयमा कोषले देहाय अनुसारका मुख्य निर्णयहरू गरेको छ:
- बिहान ३ बजेदेखि नै ढोका खोलिने: तीजका दिन मन्दिरमा आउने भक्तजनको चापलाई ध्यानमा राख्दै बिहान ३:०० बजेदेखि नै पशुपतिनाथ मन्दिरका चारै वटा द्वार खुला गरिने छ।
- पारदर्शी जालीमार्फत दर्शन: मन्दिर खुलेदेखि नै उत्तर, पूर्व र दक्षिण ढोकामा पारदर्शी जाली राखी सहज रूपमा दर्शन गर्ने व्यवस्था मिलाइएको छ।
- विशेष पूजा र दर्शनको व्यवस्था: विगतका वर्षहरूमा जस्तै यस वर्ष पनि तीज पर्वका अवसरमा विशेष पूजा र विशेष दर्शनको छुट्टै व्यवस्था गरिएको कोषले जनाएको छ।
तीजका अवसरमा पशुपतिनाथ क्षेत्रमा आउने सम्पूर्ण दर्शनार्थीहरूलाई अनुशासित र सुरक्षित वातावरणमा पूजाआजा गर्ने प्रबन्ध मिलाइएको पशुपति क्षेत्र विकास काेषले जनाएकाे छ।
