काठमाडौं — काठमाडौंको भृकुटीमण्डपमा स्वर्णजयन्ती विशेष ‘नाडा अटो शो २०२६’ भव्य रूपमा सुरु भएको छ। उक्त अटो शोको उद्घाटन उपराष्ट्रपति रामसहाय प्रसाद यादवले गर्नुभएको हो।
उद्घाटन समारोहलाई सम्बोधन गर्दै उपराष्ट्रपति यादवले अटोमोबाइल क्षेत्रलाई दीर्घकालीन लगानीसँग जोडिएको महत्त्वपूर्ण क्षेत्रका रूपमा व्याख्या गर्नुभयो। उहाँले उद्योगको विकास, लगानीको सुरक्षा, रोजगारी सिर्जना र उपभोक्ताको हितबीच सन्तुलन कायम गर्नुपर्नेमा जोड दिँदै सरकार र निजी क्षेत्रबीच निरन्तर संवादमार्फत स्थिर, पारदर्शी र लगानीमैत्री नीति निर्माण गर्न आग्रह गर्नुभयो।
उपराष्ट्रपति यादवले नाडाको ५० वर्षको यात्रालाई नेपालको अटोमोबाइल क्षेत्रको विकाससँग जोडिएको ऐतिहासिक यात्राका रूपमा उल्लेख गर्नुभयो। विश्व अटोमोबाइल उद्योग विद्युतीय सवारी, स्वचालित सवारी, स्मार्ट मोबिलिटी र डिजिटल प्रविधितर्फ अघि बढिरहेकाले नेपाललाई प्रविधि, सेवा, सीप र उत्पादनको क्षेत्रीय केन्द्रका रूपमा विकास गर्न व्यवसायीहरूले यो परिवर्तनलाई अवसरका रूपमा लिनुपर्ने उहाँको भनाइ थियो।
नेपाल उद्योग वाणिज्य महासंघका अध्यक्ष अन्जन कुमार श्रेष्ठले वर्तमान चुनौतीपूर्ण आर्थिक अवस्थाका कारण उद्योग व्यवसाय र व्यवसायीको मनोबल इतिहासकै कमजोर अवस्थामा पुगेको बताउनुभयो। उहाँले भन्नुभयो, “मेरो ३६ वर्षको व्यावसायिक यात्रामा उद्योगी व्यवसायीहरूको यस्तो कमजोर मनस्थिति कहिल्यै देखेको थिइनँ।”
श्रेष्ठले आगामी १० वर्षपछि देशले जनसांख्यिक लाभ गुमाउने भएकाले अहिले नै स्वदेशमै उद्योग स्थापना गरी रोजगारी सिर्जना गर्नुपर्नेमा जोड दिनुभयो। साथै, उहाँले नेपालमै अटोमोबाइलका स्पेयर पार्ट्स उत्पादनको सम्भावना रहेको औंल्याउँदै निजी क्षेत्र सरकारको लक्ष्यमा साथ दिन तयार रहेको र यसका लागि नीतिगत स्थिरता चाहिने उल्लेख गर्नुभयो।
नाडा अटोमोबाइल्स एसोसिएसन अफ नेपालका अध्यक्ष सुरेन्द्रकुमार उप्रेतीले अटोमोबाइल क्षेत्र केवल सवारीसाधनको व्यापार मात्र नभई उद्योग, बैंकिङ, बीमा, रोजगारी र राजस्वसँग प्रत्यक्ष जोडिएको बताउनुभयो। नाडाका अनुसार यस क्षेत्रले १० लाखभन्दा बढी रोजगारी सिर्जना गरेको छ भने वार्षिक ९० अर्ब रुपैयाँभन्दा बढी राजस्वमा योगदान पुर्याउँदै आएको छ।
उप्रेतीले सवारीसाधनलाई अझै पनि विलासी वस्तुका रूपमा हेर्ने दृष्टिकोणमा पुनर्विचार गरी कर नीति उपभोक्तामैत्री र व्यावहारिक बनाउन आग्रह गर्नुभयो। साथै, भृकुटीमण्डपको विद्यमान संरचना पर्याप्त नभएकाले काठमाडौंमा अन्तर्राष्ट्रियस्तरको प्रदर्शनी केन्द्र निर्माण गर्न सरकारको ध्यानाकर्षण गराउनुभयो। उहाँले स्वच्छ ऊर्जा, विद्युतीय सवारी, चार्जिङ पूर्वाधार र नेपालमै एसेम्बली तथा कम्पोनेन्ट उत्पादनमा भविष्य खोज्न सरकार र निजी क्षेत्रबीच सहकार्य आवश्यक रहेको बताउनुभयो।
