काठमाडौं — देशभर यस वर्ष धान रोपाइँ करिब ९८ प्रतिशत सम्पन्न भएको छ। कृषि विभागका अनुसार कूल १३ लाख ४१ हजार ७६४ हेक्टर क्षेत्रफलमा रोपाइँ सकिएको छ, जुन गत वर्षको तुलनामा १.९२ प्रतिशतले बढी हो।
विभागका अनुसार देशभर करिब १३ लाख ७० हजार हेक्टर जमिन धान खेतीका लागि उपयुक्त मानिन्छ। अब देशभर करिब २८ हजार हेक्टर क्षेत्रफलमा मात्रै रोपाइँ बाँकी रहेको छ।
प्रदेशगत रोपाइँको अवस्था:
- सुदूरपश्चिम प्रदेश: १००% (सबैभन्दा बढी)
- कर्णाली प्रदेश: ९८.५%
- मधेस प्रदेश: ९८.१०%
- लुम्बिनी प्रदेश: ९७.८७%
- बागमती प्रदेश: ९७.८२%
- कोशी प्रदेश: ९७%
- गण्डकी प्रदेश: ९६.६८%
कृषि विभागका महानिर्देशक प्रकाशकुमार सञ्जेलका अनुसार मधेसलगायत केही क्षेत्रमा सुरुमा पर्याप्त वर्षा नहुँदा रोपाइँ केही ढिला भए पनि पछिल्लो समय मनसुन सक्रिय भएसँगै रोपाइँले गति लिएको हो।
अधिकांश क्षेत्रमा अझै पनि धान खेतीका लागि आकाशे पानीमै निर्भर रहनुपर्ने बाध्यता छ। यद्यपि यस वर्ष मनसुन तुलनात्मक रूपमा अनुकूल रहेकाले धान उत्पादन बढ्ने विभागको अपेक्षा छ। रोपाइँ सकिए पनि अन्तिम उत्पादन भने वर्षाको निरन्तरता, बाढी-पहिरोको जोखिम, रोग-कीरा नियन्त्रण र मलखादको सहज उपलब्धतामा निर्भर रहने देखिन्छ।
