नेपाल चेम्बर अफ कमर्सका अध्यक्ष कमलेश कुमार अग्रवालले आधुनिक बिक्री (सेल्स) प्रणालीलाई केवल वस्तु वा सेवा बेच्ने माध्यमका रूपमा नभई ग्राहकसँग दीर्घकालीन सम्बन्ध निर्माण गर्ने रणनीतिक प्रक्रियाका रूपमा व्याख्या गरेका छन्। उनले बदलिँदो विश्वव्यापी बजारमा सफल व्यवसायका लागि ग्राहकको आवश्यकता बुझ्ने, मूल्य सिर्जना गर्ने, विश्वास कायम गर्ने र प्रविधिको प्रभावकारी उपयोग गर्न सक्ने क्षमता अत्यावश्यक भएको बताएका छन्।
ग्रोथ लिडरशिप एकेडेमीद्वारा शुक्रबार होटल सोल्टीमा आयोजित ‘सेल्स समिट’ कार्यक्रममा प्रमुख अतिथिका रूपमा सम्बोधन गर्दै अध्यक्ष अग्रवालले परम्परागत बिक्री शैली र आधुनिक बिक्री प्रणालीबीचको अन्तर स्पष्ट पारे। उनका अनुसार विगतमा बिक्रीकर्मीहरू व्यक्तिगत अनुभव, सम्बन्ध र अन्तर्ज्ञानमा आधारित भएर काम गर्थे भने अहिलेको प्रतिस्पर्धी बजारमा डेटा, डिजिटल प्रविधि र कृत्रिम बुद्धिमत्ताले बिक्री प्रक्रियालाई नयाँ स्तरमा पुर्याएको छ।
उनले ग्राहकसँग हुने प्रत्येक अन्तरक्रिया व्यवसायका लागि मूल्यवान् सूचना भएको उल्लेख गर्दै ग्राहकको रुचि, खरिद व्यवहार, डिजिटल गतिविधि, प्रतिक्रिया र बजार प्रवृत्तिबाट प्राप्त तथ्यांकले व्यवसायलाई सही निर्णय लिन मद्दत गर्ने बताए। तर डेटा संकलन मात्र पर्याप्त नभएको उल्लेख गर्दै उनले त्यसको विश्लेषण गरी उपयोगी जानकारीमा रूपान्तरण गर्नुपर्ने र त्यसलाई व्यावसायिक नतिजामा बदल्न सक्नुपर्ने धारणा राखे।
अग्रवालका अनुसार भविष्यका सफल बिक्री व्यवसायीहरू डेटा बुझ्न, त्यसको विश्लेषण गर्न र ग्राहकको आवश्यकताअनुसार समाधान प्रस्तुत गर्न सक्षम हुनुपर्छ। उनले कृत्रिम बुद्धिमत्ता (एआई) को प्रयोगले ग्राहकको आवश्यकता पहिचान, बजार मागको पूर्वानुमान, व्यक्तिगत सेवा प्रदान तथा बिक्री उत्पादकत्व वृद्धि गर्न महत्वपूर्ण भूमिका खेलिरहेको बताए।
यद्यपि, उनले प्रविधिले मानवको भूमिका पूर्ण रूपमा प्रतिस्थापन गर्न नसक्ने स्पष्ट गरे। “प्रविधि एक शक्तिशाली उपकरण हो, तर ग्राहकसँग विश्वास निर्माण गर्ने, सहानुभूति देखाउने र प्रभावकारी संवाद गर्ने क्षमता अझै पनि मानिसमै निर्भर छ,” उनले भने। उनका अनुसार सफल बिक्रीको आधार प्रविधि र मानवीय सम्बन्धबीचको सन्तुलन हो।
नेपालको आर्थिक विकासमा दक्ष बिक्रीकर्मी र व्यावसायिक नेतृत्वको महत्वपूर्ण भूमिका रहेको उल्लेख गर्दै अग्रवालले पर्यटन, जलविद्युत्, सूचना प्रविधि, कृषि, उत्पादन, वित्तीय सेवा, शिक्षा तथा सिर्जनात्मक उद्योगमा अपार सम्भावना रहेको बताए। उनले राम्रो उत्पादन वा सेवा निर्माण गर्नु मात्र पर्याप्त नहुने भन्दै त्यसलाई राष्ट्रिय तथा अन्तर्राष्ट्रिय बजारसम्म प्रभावकारी रूपमा पुर्याउन सक्ने क्षमता विकास गर्नुपर्नेमा जोड दिए।
उनले नेपाली पर्यटनलाई उच्चस्तरीय पर्यटकसम्म कसरी पुर्याउने, सूचना प्रविधि सेवाहरूलाई विश्व बजारमा कसरी प्रतिस्पर्धी बनाउने तथा कृषि उत्पादनलाई अन्तर्राष्ट्रिय ब्रान्डमा कसरी रूपान्तरण गर्ने भन्ने प्रश्नहरू निजी क्षेत्र र सरकार दुवैका साझा जिम्मेवारी भएको बताए।
अग्रवालले मानव पूँजी विकासलाई आर्थिक रूपान्तरणको प्रमुख आधार मान्दै नयाँ पुस्तालाई प्रविधिमैत्री, डेटा-आधारित, नैतिक, सिर्जनशील र ग्राहककेन्द्रित बनाउनुपर्ने आवश्यकता औँल्याए। उनले शैक्षिक प्रमाणपत्र मात्र पर्याप्त नहुने भन्दै निरन्तर सिकाइ, व्यावहारिक सीप, नेतृत्व क्षमता र नवप्रवर्तनशील सोच विकास गर्न युवालाई आग्रह गरे।
सम्बोधनको अन्त्यमा उनले युवालाई महत्त्वाकांक्षी, प्रतिस्पर्धी र प्रविधिमैत्री बन्न आग्रह गर्दै नैतिकता, सहकार्य र मानवीय मूल्यलाई कहिल्यै नबिर्सन सुझाव दिए। निजी क्षेत्र, शैक्षिक संस्था र व्यावसायिक संगठनहरूबीच सहकार्य बढाएर भविष्यको बजारका लागि सक्षम जनशक्ति तयार गर्न सके नेपालको अर्थतन्त्रलाई नयाँ उचाइमा पुर्याउन सकिने विश्वास उनले व्यक्त गरे।
