गरिमा विकास बैंक लिमिटेडले आफ्नो केन्द्रीय कार्यालय काठमाडौँ महानगरपालिका–३, बालुवाटारस्थित नवनिर्मित आफ्नै भवनमा स्थानान्तरण गरी औपचारिक रूपमा सञ्चालनमा ल्याएको छ।
गएको भाद्र ३ गते बुधबार आयोजित एक विशेष समारोहका बिच नेपाल राष्ट्र बैंकका गभर्नर प्रा. डा. विश्वनाथ पौडेलले नवनिर्मित केन्द्रीय कार्यालय भवनको समुद्घाटन गर्नुभएको हो। यसअघि बैंकको केन्द्रीय कार्यालय लाजिम्पाटमा रहेको थियो। समुद्घाटनको अवसरमा कार्यालय परिसरमा निर्मित मन्दिरमा शिव पञ्चायत प्राण प्रतिष्ठासहित धार्मिक पूजाआजा समेत आयोजना गरिएको थियो।
कार्यक्रममा धितोपत्र बोर्डका अध्यक्ष डा. गोपाल प्रसाद भट्ट, नेपाल राष्ट्र बैंकका अधिकारीहरू, बैंकका सञ्चालक समिति सदस्य, पूर्व पदाधिकारी, उच्च व्यवस्थापन अधिकृत, अन्य बैंक तथा वित्तीय संस्थाका प्रमुख कार्यकारी अधिकृत, सेयरधनी, कर्मचारी तथा ग्राहकहरूको उपस्थिति रहेको थियो।
मुख्य झलकहरू:
- ऐतिहासिक यात्रा: वि.सं. २०६४ कात्तिक १८ गते स्याङ्जाको वालिङबाट वित्तीय कारोबार सुरु गरेको यस बैंकले २०६७ वैशाख १ गते पोखराको महेन्द्रपुल र राष्ट्रिय स्तरमा स्तरोन्नति भएपछि २०७३ चैत २७ गते काठमाडौँको लाजिम्पाटमा केन्द्रीय कार्यालय स्थानान्तरण गरेको थियो।
- प्रमुख कार्यकारी अधिकृतको भनाइ: बैंकका प्रमुख कार्यकारी अधिकृत माधव प्रसाद उपाध्यायले वालिङबाट सुरु भएको यात्रा आफ्नै स्वामित्वको भवनसम्म आइपुग्दा बैंकको नयाँ अध्याय सुरु भएको बताउनुभयो।
- अध्यक्षको प्रतिबद्धता: बैंकका अध्यक्ष दिलिप प्रताप खाँणले ग्राहकलाई थप सहज, प्रभावकारी तथा गुणस्तरीय बैंकिङ सेवा प्रदान गर्दै संस्थागत सुशासन, प्रविधि र दिगो विकासलाई प्राथमिकतामा राखेर अघि बढ्ने प्रतिबद्धता व्यक्त गर्नुभयो।
हाल गरिमा विकास बैंकले देशभर १२६ शाखा कार्यालय, ५१ एटिएम र अत्याधुनिक बैंकिङ सुविधामार्फत करिब १० लाख ग्राहकहरूलाई सेवा प्रदान गर्दै आएको छ।
