काठमाडौं। नेपालका लागि प्रोटोन गाडीको आधिकारिक वितरक जगदम्बा मोटर्स प्रालिले नयाँ प्रोटोन इ.मास ५ कम्प्याक्ट इलेक्ट्रिक एसयूभी नेपाली बजारमा सार्वजनिक गरेको छ। सोल्टी काठमाडौंमा आयोजित विशेष कार्यक्रममा सार्वजनिक गरिएको यो मोडल नेपालमा प्रोटोनको दोस्रो विद्युतीय सवारीसाधन हो।
सहरी यात्रालाई सहज र सुविधाजनक बनाउने उद्देश्यले ल्याइएको इ.मास ५ अत्याधुनिक प्रविधि, स्मार्ट डिजाइन र उपयोगितामुखी विशेषतासहित बजारमा आएको कम्पनीले जनाएको छ। यसअघि यो गाडीले मलेसियाको प्रतिष्ठित ‘अलायान्ज डीएसएफ भेहिकल अफ द इयर अवार्ड्स २०२६’ मा ‘इलेक्ट्रिक कम्प्याक्ट भेहिकल अफ द इयर’ उपाधि समेत जितिसकेको छ।
गाडीमा १४.६ इन्चको टचस्क्रिन इन्फोटेनमेन्ट प्रणाली, वायरलेस एप्पल कारप्ले र एन्ड्रोइड अटोको सुविधा उपलब्ध छ। साथै ७० लिटर क्षमताको अगाडिको फ्रन्ट ट्रङ्क (फ्रङ्क), ३७५ लिटरको पछाडिको लगेज बुट र केबिनभित्र ३२ वटा स्टोरेज स्पेस उपलब्ध गराइएको छ, जसले दैनिक प्रयोगदेखि लामो दूरीको यात्रासम्म सहजता प्रदान गर्ने कम्पनीको दाबी छ।
सार्वजनिक कार्यक्रममा नेपालस्थित मलेसियाली दूतावासका प्रतिनिधि, अटोमोबाइल क्षेत्रका सरोकारवाला, व्यावसायिक साझेदार, सञ्चारकर्मी, अटो पत्रकार, इन्फ्लुएन्सर तथा ग्राहकहरूको उल्लेखनीय उपस्थिति रहेको थियो। कार्यक्रममा विद्युतीय सवारीप्रति नेपाली उपभोक्ताको बढ्दो आकर्षण झल्किएको कम्पनीले जनाएको छ।
कार्यक्रमलाई सम्बोधन गर्दै जगदम्बा मोटर्सका कार्यकारी निर्देशक अखिल गुप्ताले प्रोटोनसँगको सहकार्यलाई थप विस्तार गर्दै नेपाली बजारमा इ.मास ५ सार्वजनिक गर्न पाउँदा खुशी लागेको बताए। उनले आधुनिक प्रविधि, उपयोगिता, आकर्षक फिचर र प्रतिस्पर्धी मूल्यका कारण यो मोडल नेपाली ग्राहकका लागि उत्कृष्ट कम्प्याक्ट इलेक्ट्रिक एसयूभी बन्ने विश्वास व्यक्त गरे।
प्रोटोन इन्टरनेसनलका डेपुटी डाइरेक्टर लि झिदानले विश्वभर ६ लाख १० हजारभन्दा बढी ग्राहकले इ.मास ५ मा प्रयोग भएको प्लेटफर्ममा आधारित सवारी रोजिसकेको उल्लेख गर्दै नेपाललाई कम्पनीको अन्तर्राष्ट्रिय विस्तार रणनीतिमा महत्वपूर्ण बजारका रूपमा लिइएको बताए। जगदम्बा मोटर्ससँगको सहकार्यले नेपाली बजारमा प्रोटोन इ.मासलाई विश्वसनीय विद्युतीय ब्रान्डका रूपमा स्थापित गर्ने उनको विश्वास छ।
प्रोटोन इ.मास ५ प्राइम र प्रिमियम गरी दुई भेरियन्टमा उपलब्ध हुनेछ। सार्वजनिक अवसरमा कम्पनीले प्राइम भेरियन्टको मूल्य २९ लाख ९९ हजार रुपैयाँ र प्रिमियम भेरियन्टको मूल्य ३४ लाख ९९ हजार रुपैयाँ तोकेको छ। यो विशेष मूल्य पहिलो १०० ग्राहकका लागि सीमित अवधिसम्म मात्र लागू हुने कम्पनीले जनाएको छ।
ग्राहकले देशभर रहेका प्रोटोन इ.मास शोरुममा पुगेर गाडीको प्रत्यक्ष अवलोकन तथा परीक्षण गर्न सक्नेछन्। साथै सुरुवाती अफर अन्तर्गत सीमित अवधिभित्र बुकिङ पनि खुला गरिएको कम्पनीले जानकारी दिएको छ।
