“सर्वसाधारणको ढाड सेक्ने गरी चलाइएको यो ‘राजस्व असुली धन्दा’ तत्काल बन्द गरिनुपर्छ। यदि राज्यले आफ्नो फासिवादी चरित्र नसच्याउने हो र जनतालाई यसरी नै सास्ती दिइरहने हो भने, भोलि व्यवस्था र संयन्त्रका विरुद्ध सडकमा थुप्रै ‘गणेश नेपालीहरू’ आत्मदाह गर्न बाध्य हुनेछन्।”
- भोजराज घिमिरे
काठमाडौं, २६ असार । सन् १९६३ जुन ११ मा दक्षिण भियतनामको सैगनमा तत्कालीन अमेरिकी समर्थित फासिवादी सरकारको दमनविरुद्ध बौद्ध भिक्षु थिङ क्वाङ डुकले सार्वजनिक गुडामै आत्मदाह गरेका थिए। इतिहासको त्यही भयानक र दर्दनाक दृश्यको एउटा पीडादायी झल्को बिहीबार (असार २५ गते) नेपालको राजधानी काठमाडौंमा पनि देखिएको छ।
त्रिपुरेश्वरस्थित राहदानी विभागको ३ नम्बर गेट अगाडि ललितपुर बस्ने २५ वर्षीय युवा गणेश नेपालीले आफ्नै शरीरमा आगो लगाई आत्मदाहको प्रयास गरेका छन्। ६० प्रतिशतभन्दा बढी शरीर जलिसकेका नेपालीको अवस्था यतिबेला चिन्ताजनक छ र उनी अस्पतालमा जीवन र मरणको दोसाँधमा छन्।
पीडित गणेश नेपाली कुनै राजनीतिक आन्दोलनकारी वा अपराधी होइनन्। उनी त केवल आफ्नो र परिवारको पेट पाल्न दिनरात काठमाडौंका सडकमा मोटरसाइकल राइडिङ (पठाओ/इनड्राइभर) गर्ने एक श्रमजीवी युवा हुन्।
आफ्नो पसिनाको कमाइबाट गुजारा चलाइरहेका नेपालीले मोटरसाइकल पार्किङ गरेको ठाउँमा ट्राफिक प्रहरीले ‘ह्विल लक’ (पाङ्ग्रामा ताल्चा) लगाइदिएपछि विवाद सुरु भएको थियो। दैनिक श्रम गरेर जीविकोपार्जन गर्ने एउटा नागरिकका लागि ट्राफिक प्रहरीले थोपर्ने चर्को जरिवाना र प्रशासनिक सास्ती कतिसम्म मानसिक यातना बन्न सक्छ भन्ने कुरा यो घटनाले उदाङ्गो पारेको छ।
यो घटनाले वर्तमान सरकार र यसका संयन्त्रहरूको क्रुर र असंवेदनशील अनुहारलाई पुनः छताछुल्ल पारेको छ। नागरिकलाई अभिभावकत्व र सुविधा दिनुको सट्टा राज्य जसरी हुन्छ ‘राजस्व असुली धन्दा’ मा मात्र केन्द्रित भएको जनआक्रोश चुलिएको छ। सर्वसाधारण नागरिकको आर्थिक हैसियत र कमाइको वास्तै नगरी, तिर्नै नसक्ने जरिवाना र राजस्वको भारी जनताको टाउकोमा थुपारेर राज्यले नै जनतालाई आतंकित पारिरहेको छ।
“सर्वसाधारणको ढाड सेक्ने गरी चलाइएको यो ‘राजस्व असुली धन्दा’ तत्काल बन्द गरिनुपर्छ। यदि राज्यले आफ्नो फासिवादी चरित्र नसच्याउने हो र जनतालाई यसरी नै सास्ती दिइरहने हो भने, भोलि व्यवस्था र संयन्त्रका विरुद्ध सडकमा थुप्रै ‘गणेश नेपालीहरू’ आत्मदाह गर्न बाध्य हुनेछन्।”
