काठमाडौँ । नेपालमा निकै रुचाइएको ओमोडा ई५ को अपग्रेड भर्सन ‘ओमोडा ई५ प्रो’ सार्वजनिक भएको छ।
नेपालका लागि आधिकारिक बिक्रेता एसपीजी अटोमोबाइल्सले नेपाली सडकमा पहिलो संस्करणले पाएको लोभलाग्दो सफलतापछि यो नयाँ र परिष्कृत मोडल बजारमा उतारेको हो।
कम्पनीले नयाँ ओमोडा ई५ प्रोको आधिकारिक मूल्य सिंगल टोन भेरियन्टका लागि ५१ लाख ५९ हजार रुपैयाँ र डुअल टोन भेरियन्टका लागि ५१ लाख ९९ हजार रुपैयाँ तोकेको छ।
गाडी सार्वजनिक भएको विशेष अवसरमा कम्पनीले पहिलो ५० जना ग्राहकका लागि आकर्षक सुरुवाती अफर घोषणा गरेको छ।
जसअन्तर्गत ग्राहकले यो गाडी मात्र ४९ लाख ९९ हजार रुपैयाँमा खरिद गर्न सक्नेछन् भने एक वर्षको सवारी बीमा सुविधा पनि पूर्ण रूपमा निःशुल्क प्राप्त गर्नेछन्
कम्पनीका अनुसार हालसम्म १५ सयभन्दा बढी ओमोडा ई५ नेपाली सडकमा गुडिरहेका छन् र नयाँ ई५ प्रोले त्यो विरासतलाई थप उचाइमा पुर्याउने अपेक्षा गरिएको छ।
नयाँ संस्करणमा ५०.७ किलोवाट आवर क्षमताको ब्याट्री र ९९ किलोवाट क्षमताको शक्तिशाली विद्युतीय मोटर जडान गरिएको छ। २८८ न्युटन मिटर टर्क उत्पादन गर्ने यो गाडीले एकपटकको पूर्ण चार्जमा डब्लुएलटिपी मापदण्डअनुसार ३५० किलोमिटरको रेन्ज दिने कम्पनीको दाबी छ।
१९१ मिलिमिटरको उत्कृष्ट ग्राउन्ड क्लियरेन्सका कारण यो गाडी नेपाली सडकका विविध अवस्थाका लागि निकै उपयुक्त मानिएको छ भने १८ इन्चका आकर्षक अलोय ह्विलले यसको बाह्य स्वरूपलाई थप प्रिमियम र स्पोर्टी लुक दिएका छन्।
गाडीको बाहिरी बनावट आधुनिक र ‘फ्युचरिस्टिक’ शैलीमा तयार पारिएको छ। यसको अगाडिको भाग, हावाको प्रतिरोध कम गर्ने आकर्षक डिजाइन र विशेष पछाडिका बत्तीहरूले यसलाई सडकमा गुड्दा छुट्टै र विशिष्ट पहिचान दिन्छन्।
भित्री भाग (इन्टेरियर) को कुरा गर्दा, यसलाई अत्यधिक आरामदायी र प्रिमियम अनुभव प्रदान गर्ने गरी सजाइएको छ। इलेक्ट्रिक सनरुफ, उच्चस्तरीय सामग्रीको प्रयोग र आधुनिक प्रविधिको फ्युजनले यात्रालाई सहज बनाउनेछ। विशेषगरी, यात्राको अनुभवलाई थप मनोरञ्जनपूर्ण र विलासी बनाउन यसमा मसाज सुविधा भएको चालक सिट, आठवटा सोनी अडियो सिस्टम र १५.६ इन्चको ठुलो स्क्रिन समावेश गरिएको छ।
सुरक्षाका दृष्टिकोणले पनि नयाँ ओमोडा ई५ प्रो निकै सशक्त छ। चालक र यात्रुको पूर्ण सुरक्षाका लागि यसमा १९ भन्दा बढी उन्नत चालक सहायता फिचरहरू राखिएका छन्। यसका साथै, ५४० डिग्री दृश्य देखाउने आधुनिक क्यामेरा प्रणालीले चालकलाई अप्ठ्यारा मोड र पार्किङमा थप सहजता प्रदान गर्नेछ।
