काठमाडौं । वैसाख २४,अन्तर्राष्ट्रिय स्तरमा नेपाली खानाको मौलिकता, विविधता तथा सांस्कृतिक पहिचानको संरक्षण र प्रवर्द्धन गर्ने उद्देश्यका साथ International Nepali Chef Society र Nepalese Chef’s Society को संयुक्त आयोजनामा ‘Second National Culinary Challenge Competition 2026’ हुने भएको छ।
आगामी मे १५ र १६ (जेठ १ र २) गते Pathibhara Culinary Art College, दमक–झापा मा सञ्चालन हुने उक्त प्रतियोगिताले नेपाली पाककलालाई व्यावसायिकता, नवप्रवर्तन र अन्तर्राष्ट्रिय प्रतिस्पर्धात्मक क्षमतातर्फ उन्मुख गराउने लक्ष्य लिएको छ।
कार्यक्रममा नेपालका सातै प्रदेशका मौलिक तथा रैथाने परिकारहरूको खोज, अनुसन्धान, संरक्षण र प्रवर्द्धन लाई विशेष प्राथमिकता दिइनेछ। विभिन्न भौगोलिक क्षेत्रका लोपोन्मुख तथा परम्परागत खानाहरू एकै थलोमा प्रस्तुत गरिँदै आधुनिक कूलिनरी प्रविधि र परम्परागत स्वादबीच सन्तुलन कायम गर्ने प्रयास गरिनेछ। यसमार्फत नयाँ पुस्ताका शेफहरूलाई सिर्जनशीलता र नवप्रवर्तन तर्फ प्रेरित गर्ने आयोजकको उद्देश्य छ।
प्रतियोगिताअन्तर्गत खुला पाककला प्रतियोगिता, विभिन्न फुड कम्पिटिसन तथा भव्य फुड फेस्टिभल आयोजना गरिनेछ। ५० भन्दा बढी स्टलहरू रहने फेस्टिभलमा स्थानीयदेखि अन्तर्राष्ट्रिय स्तरका परिकारहरूको स्वाद लिन सकिनेछ।
कार्यक्रमको अर्को आकर्षणका रूपमा १० भन्दा बढी देशका अनुभवी अन्तर्राष्ट्रिय शेफहरू निर्णायक (जज) का रूपमा सहभागी हुनेछन्। उनीहरूको उपस्थितिले नेपाली शेफहरूलाई विश्वस्तरीय मूल्यांकन, मार्गदर्शन तथा अनुभव आदान–प्रदान को महत्वपूर्ण अवसर प्रदान गर्ने विश्वास आयोजकले व्यक्त गरेका छन्।
प्रतियोगितामा सहभागिताका लागि ३ जनाको टिम अनिवार्य गरिएको छ। सहभागी टिमहरूले सोसाइटीको आधिकारिक खातामा दर्ता शुल्क जम्मा गरी सहभागिता सुनिश्चित गर्नुपर्नेछ।
Nepalese Chef’s Society (स्थापना: २०८१) ले “नेपाली शेफहरूको व्यक्तित्व विकास तथा नेपाली खानाको स्तर उन्नतिका लागि हाम्रो अभियान” भन्ने मूल नारासहित कार्यक्रम आयोजना गर्न लागेको जनाएको छ।
पुरस्कार राशिहरू
- प्रथम पुरस्कार: रु. १,००,०००
- दोस्रो पुरस्कार: रु. ७५,०००
- तृतीय पुरस्कार: रु. ५०,०००
यसका अतिरिक्त, सहभागी सबै प्रतियोगीहरूलाई मेडल तथा प्रमाणपत्र प्रदान गरिनेछ भने प्रत्येक टिमलाई ‘मिस्ट्री बक्स’ समेत उपलब्ध गराइनेछ।
कार्यक्रमले पाककला क्षेत्रको विकास, पर्यटन प्रवर्द्धन, स्थानीय उत्पादनको बजारीकरण, रोजगारी सिर्जना तथा सांस्कृतिक संरक्षण मा समेत महत्वपूर्ण योगदान पुर्याउने आयोजकको विश्वास छ।
