काठमाडौं । नेपाल टेलिकमले चालु आर्थिक वर्ष २०८२/८३ को दोस्रो त्रैमासिक अवधिको अपरिष्कृत वित्तीय विवरण सार्वजनिक गरेको छ।
सार्वजनिक विवरण अनुसार कम्पनीको खुद मुनाफामा गत वर्षको सोही अवधिको तुलनामा १२.९८ प्रतिशतले कमी आएको छ।
गत आर्थिक वर्षको दोस्रो त्रैमासिकसम्म ४ अर्ब ७८ करोड ५९ लाख रुपैयाँ खुद मुनाफा आर्जन गरेको कम्पनीले यस वर्ष सोही अवधिमा ४ अर्ब १६ करोड ४५ लाख रुपैयाँ मात्र नाफा कमाएको छ।
कम्पनीको सञ्चालन आयमा भने सामान्य वृद्धि देखिएको छ। यस अवधिमा टेलिकमले १७ अर्ब २९ करोड ९७ लाख रुपैयाँ सञ्चालन आय गरेको छ, जुन गत वर्षको तुलनामा १.७३ प्रतिशतले बढी हो। तर, कम्पनीको कुल आय भने १.५ प्रतिशतले घटेर १९ अर्ब २२ करोड ७२ लाख रुपैयाँमा सीमित भएको छ। मुनाफासँगै कम्पनीको प्रति शेयर आम्दानी ४६ रुपैयाँ २७ पैसा कायम भएको छ।
नाफा घट्नुमा भाइबर, ह्वाट्सएप जस्ता ओटीटी सेवाहरूको बढ्दो प्रयोगलाई प्रमुख कारण मानिएको छ। यस्ता सेवाका कारण विदेशबाट आउने कलको परिमाण घट्दा अन्तर-आबद्धता आयमा ८ करोड ५ लाख रुपैयाँभन्दा बढीको गिरावट आएको छ, जसले समग्र भ्वाइस र एसएमएस सेवाको आयलाई प्रभावित तुल्याएको छ।
यसका साथै बैंक तथा वित्तीय संस्थाको ब्याजदर घट्नुले पनि कम्पनीको ब्याज आम्दानीमा ३२ प्रतिशत अर्थात् ७४ करोड ६३ लाख रुपैयाँले कमी ल्याएको छ।
वित्तीय विवरण अनुसार कम्पनीको खर्च प्रणालीमा पनि उल्लेख्य परिवर्तन आएको छ। कर्मचारीहरूको योगदानमा आधारित पेन्सन योजना र बीमा शुल्कमा भएको वृद्धिका कारण कर्मचारी खर्च ११.५ प्रतिशतले बढेको छ। त्यस्तै, विकट क्षेत्रमा सेवा विस्तार गर्दा लाग्ने उच्च लागत, नियामक नीतिमा आएको परिवर्तनका कारण सेवाको दररेटमा भएको कटौती, र जिन्सी मौज्दातमा गरिएको आवश्यक खर्च व्यवस्थाका कारण पनि नाफामा संकुचन देखिएको हो।
यद्यपि, कम्पनीका लागि विदेशी मुद्रा सटहीको क्षेत्र भने निकै उत्साहजनक देखिएको छ। विदेशी मुद्राको सटही दरमा भएको परिवर्तनले गर्दा सटही नाफा गत वर्षको तुलनामा १५० प्रतिशतले वृद्धि भएको छ।
कम्पनीले हाल राष्ट्रिय सञ्चारको जिम्मेवारी बहन गर्दै कम प्रतिफल हुने दुर्गम स्थानहरूमा समेत सेवा विस्तार र गुणस्तर सुधारका कार्यहरूलाई निरन्तरता दिइरहेको छ।
