काठमाडौं । नेपाल सरकारले लागू गरेको नेपाल सवारी प्रदूषण मापदण्ड २०८२ (युरो–६) कार्यान्वयनसँगै नाडा अटोमोवाइल्स एशोसिएशन अफ नेपालले आफ्ना सदस्य तथा आयातकर्ताहरूलाई तोकिएको समयसीमा भित्र भन्सार जाँचपास पूरा गर्न आग्रह गरेको छ।
वन तथा वातावरण मन्त्रालयले मिति २०८२ असार ९ को नेपाल राजपत्रमार्फत युरो–६ मापदण्ड औपचारिक रूपमा लागू गरिसकेको छ। सोही सन्दर्भमा अर्थ मन्त्रालयले मिति २०८२ असोज १० गतेको नेपाल राजपत्रद्वारा नयाँ मापदण्ड लागू हुनु पूर्व प्रोफर्मा इन्भ्वाइस जारी भइसकेका सवारी साधन, साथै नेपालमै एसेम्बलरउत्पादन हुने सवारी साधन र तिनका पार्टपूर्जा को हकमा मिति २०८२ मंसिर १५ गतेसम्म पुरानै मापदण्ड अनुसार आयात गर्न सकिने व्यवस्था गरेको छ।
यस प्रावधान अन्तर्गत नाडाले तोकिएको समयावधिभित्र बाँकी रहेका सवारी साधनहरूको भन्सार प्रक्रियालाई शीघ्र पूरा गर्न आयातकर्ताहरुलाई ध्यानाकर्षण गराएको छ।
नाडाका अनुसार यस विषयमा आवश्यक समन्वय र पहलका लागि संस्थाले वन तथा वातावरण मन्त्रालय र अर्थ मन्त्रालयसँग पत्राचारसमेत गरिसकेको जानकारी दिएको छ।
