ललितपुर क्षेत्र नम्बर ३ मा राष्ट्रिय स्वतन्त्र पार्टीबाट उम्मेदवारी दिएकी डा. तोसिमा कार्कीले निर्वाचन आयोगको लाभकाे पदमा रहेकाे भन्दै उम्मेदवारी खारेज गरेकाे निर्णयप्रति असन्टुष्ट जनाएकी छिन्।
उम्मेदवारी खारेजीको पत्र बुझ्न आयोग पुगेकी उनले सञ्चारकर्मीहरूसँग कुरा गर्दै आयोगको निर्णयविरुद्ध सर्वोच्च अदालत जाने बताएकी छिन्। आयोगले कार्की नेपाल मेडिकल काउन्सिलको निर्वाचित सदस्य भई लाभको पदमा बहाल रहेको भन्दै शनिबार उनको उम्मेदवारी खारेज गरेको थियो।
‘नीतिगत रूपमा स्पष्ट व्याख्या नगरी, कुनै पनि कानुनमा नटेकी मेरो उम्मेदवारी खारेज गरिएको छ। कुनै पनि ऐन–कानुनले राजीनामा नभएको पदबाट मैले राजीनामा नदिएको आरोप लगाएर उम्मेदवारी खारेज भएको अवस्थामा निष्पक्ष हुनुपर्ने निर्वाचन आयोगको गतिविधिमा नै मैले शंका गर्नुपर्ने बाध्यता सिर्जना भएको छ,’ कार्कीले बताइन्, ‘न्याय माग्न म सम्मानित सर्वोच्च अदालत जानेछु। भोलि बिहान रिट दर्ता गर्दै छु।’
आफूले पाटन अस्पतालको जागिरबाट राजीनामा दिइसकेको र नेपाल मेडिकल काउन्सिलको संलग्नतालाई कुनै पनि कानुनले लाभको पदका रूपमा व्याख्या नगरेको उनको दाबी छ।
‘मैले बुझ्दा लाभको पद भनेको सरकारी कोषबाट नियमित रूपले पारिश्रमिक तलब खाइरहेकाे पोस्टलाई लाभको पद मानिने रहेछ। तर, त्यसमा निर्वाचित र मनोनीत पदचाहिँ पर्दो रहेनछ,’ कार्कीले भनिन्।
आफूले मनोनयन दर्ताको २५ दिनअघि नै (भदौ २८)मा लाभको पदबारे थप सल्लाहका लागि आयोगमा निवेदन दिए पनि कुनै जवााफ नदिएको भन्दै गुनासो गरिन्।
