काठमाडौं । दक्षिण एसियाली महिलाहरुको सम्मेलन यही वैशाख ३०, ३१ र जेठ १ गते काठमाडाैंमा हुने भएको छ ।
‘ग्रामीण पर्यटनमा दिगो विकास र महिला सशक्तीकरण’लाई मुख्य विषयवस्तु बनाएर ललितपुरस्थित अन्तर्राष्ट्रिय विकास संस्था, भारतको नयाँदिल्लीस्थित दक्षिण एसियाली महिलाहरुको सञ्जाल र हिमालपार वातावरण तथा जीविकोपार्जन कार्यक्रम नेपालले उक्त सम्मेलन आयोजना गर्न लागेका हुन् ।
सम्मेलनले ‘दक्षिण एसियाभरका महिलाहरुले आर्थिक सशक्तीकरणका विषयमा झेलेका र भोगिरहेका अप्ठेरोको विषयवस्तुलाई लक्षित गरेको आयोजक अन्तर्राष्ट्रिय विकास संस्थाले जनाएको छ । उक्त विषयवस्तुमा वित्तीय पहुँच, बजारीकरण, डिजिटल प्रविधि र व्यवसायिक विकास रहेका छन् ।
लघु, साना र मध्यमस्तरका व्यवसायहरुलाई विशेष जोड दिँदै ग्रामीण पर्यटन, कृषि र जलवायु परिवर्तन जस्ता समसामयिक विषयमा पनि सम्मेलनमा छलफल हुनेछ ।
सम्मेलन कन्भेयर दक्षिण एसियाली महिलाहरुको सञ्जाल नयाँ दिल्लीका प्राध्यापक वीणा सिक्रीका अनुसार सम्मेलनमा दक्षिण एसियाका कैयौं अगुवा महिलाहरुको सहभागिता हुनेछ ।
सम्मेलनले यस क्षेत्रमा रहेका ग्रामीण महिलाहरुको प्रत्यक्ष सहभागितामा प्रविधियुक्त ग्रामीण पर्यटनको किास र प्रवर्द्धन गर्दै महिला सशक्तीकरणको आयाम तय गर्ने उनले बताइन् ।
उनका अनुसार यसले एकातिर सीप र आयआर्जनमा महिलाको नेतृत्व बढाउँछ भने अर्कोतिर दिगो विकासको एउटा लक्ष्य हासिल गर्नसमेत मद्दत पुर्याउनेछ ।
यो सम्मेलन पहिलो पटक नेपालमा हुने सम्मेलनले दक्षिण एसियाली महिलाहरुद्वारा सञ्चालित लघु, साना र मध्यमस्तरका व्यवसायहरुको प्रवद्र्धन गर्ने, लैङ्गिक डिजिटल ग्यापलाई कम गर्न पुलको काम गर्ने र महिलाहरुको आर्थिक सशक्तीकरणमा टेवा पुर्याउने उद्देश्य बोकेको आयोजकहरुले बताएका छन् ।
आयोजक संस्था हिमालपार वातावरण तथा जीविकोपार्जन कार्यक्रम नेपालकी याङकिला शेर्पाले दक्षिण एसियाका देशहरूमा कोभिड १९ महामारीका कारण उत्पन्न आर्थिक क्षतिलाई सम्बोधन गर्ने प्रयासमा सम्मेलनले टेवा पुर्याउने बताइन् ।
सम्मेलनले समाजको समग्र समृद्धि र आर्थिक विकासका लागि सबै महत्त्वपूर्ण क्षेत्रमा महिलाको अर्थपूर्ण सहभागितालाई पूर्ति गर्दै महिलामा, आर्थिक सशक्तीकरणको आवश्यकतालाई थप उजागर गर्ने उनले जानकारी दिइन् ।
सम्मेलनले महिला समूहहरू, विशेष गरी साना र मझौला उद्यमहरूले सामना गर्ने चुनौतीहरूलाई सम्बोधन गर्न थप मार्ग प्रशस्त गर्न र विशेष गरेर प्रविधिको प्रयोगबाट हुने रूपान्तरणका मार्गहरु चित्रण गर्ने उनको भनाइ छ ।
