– रुद्रबहादुर खड्का
फागुन २०, सिन्धुली । ठेकेदारको लापरवाहीको कारणले कमलामाई नगरपालिका–३ स्थित जलकन्या माध्यमिक विद्यालय चपौलीको भवनमा शैक्षिक पठनपाठनमा समस्या भएको छ ।
विद्यालय भवन निर्माणको जिम्मा पाएको टिडिआई एएनएस जेभीले समयमा काम नसक्दा पठनपाठनमा समस्या आएको विद्यालय प्रशासनले जनाएको छ ।
सम्झौता अनुसार एकबर्षमा सम्पन्न गर्नुपर्ने भवन निर्माण ढिलाइ हुँदा विद्यालयको पठनपाठनमा समस्या आएको हो ।
एसियाली विकास बैंक (एडिबी) को ६ करोड ९४ लाख ९८ हजार १ सय ९९रुपैयाँ सहुलियतपूर्ण ऋण सहयोगमा उक्त विद्यालयको भवन निर्माण सुरुभएको थियो । उक्त कार्यकालागि केन्द्रीय आयोजना कार्यान्वयन इकाइ (शिक्षा) र टिडिआई एएनएस जेभीबीच सन् २०२१ नोभेम्बर २ मा ठेक्का सम्झौता भएको थियोे । सम्झौतामा निर्माण सम्पन्न गर्नुपर्ने मिति २०२३ फेब्रुअरी १८ उल्लेख गरिएको छ । तर निर्माण सम्पन्न गर्ने समय बितिसक्दा पनि ठेकेदारले भवन तयार पारेको छैन ।
‘ठेकेदारले अति नै लापारवाही गरेको देखिन्छ । कहिले सामान सकिएको भन्दै चार महिनासम्म काम रोकिन्छ, त कहिले बजेट नआएको कारण देखाउँदै काम रोक्छ,’ कनपा ३ का वडा वडाध्य खड्गप्रसाद चौलागाईले बताए । सम्बन्धित निकायले चासो नदेखाउदा ठेकेदारल भवन निर्माण ढिला गरेको उनि बताउछन् ।
विद्यालयका प्रधानाध्यापक प्रेमकुमार आचार्यले निर्माण कम्पनीले ढिलासुस्ती गरेको भन्दै खबरदारी गरे पनि बेवास्ता गरिरहेको बताए । ‘एडिबीको इन्जिनियर आउँदा काम ढिलासुस्ती भएको जानकारी गराउँदा ठेकेदारको भाषा बोल्छन् । ठेकेदारलाई सम्पर्क गर्दा सम्पर्कमा आउँदैनन्,’ प्रधानाध्यापक आचार्यले बताए ।
हाल विद्यालयसँग भएको भवन विद्यार्थीका लागि अपुग भएको प्रअ आचार्यले बताए । भवन नहुँदा शैक्षिक तथा अतिरिक्त क्रियाकलाप प्रभावकारी रुपमा सञ्चालन गर्न समस्या भएको उनको गुनासो छ । अझै ५० प्रतिशत काम सम्पन्न हुन बाँकी नै रहेको छ । निमार्ण कम्पनीले पुनः निर्माण सम्पन्न मिति कति, कहिलेसम्म थपिएकोसमेत जानकारी नगराएको प्रअ आचार्यले बताए ।
