फागुन ८, काठमाडौं । वैकल्पिक ऊर्जा प्रवर्द्धन केन्द्रका निर्देशकलाई उर्जामन्त्रीले स्पष्टिकरण सोधेका छन् । केन्द्रले चालु आर्थिक वर्ष २०८०÷८१ का लागि तोकिएको नीति तथा कार्यक्रम र बजेट कार्यान्वयनमा लापरबाही गरेको र जिम्मेवारपूर्ण तरिकाले तोकिएको काम सम्पादन नगरेको ऊर्जा तथा जलस्रोत मन्त्रालयले जनाएको छ ।
केन्द्रले बनाएको वार्षिक कार्यक्रम र बजेटमा समावेश गरेका अधिकांश योजना कार्यान्वयनमा जान नसकेको भन्दै ऊर्जा जलस्रोत तथा सिँचाइमन्त्री शक्तिबहादुर बस्नेतले मंगलबार किन त्यसो भएको हो ? स्पष्ट विवरण पेस गर्न कार्यकारी निर्देशक नवराज ढकाललाई निर्देशन दिएको जनाइएको छ ।
वैकल्पिक ऊर्जा, सौर्य ऊर्जासँग जोडिएका अधिकांश परियोजनाको प्रगति असाध्यै न्यून रहेको मन्त्रालयको भनाइ छ । मन्त्री बस्नेतले सामान्यभन्दा सामान्य काममा अल्झिने, ठूला र तोकिएको काम पूरा नगर्ने प्रमुख, सम्बन्धित अधिकारीलाई कारबाहीको दायरामा ल्याउने बताए ।
अध्ययन लगायत प्रक्रियामा अल्झिएको भन्दै मन्त्री बस्नेतले केन्द्रको कार्यसम्पादन प्रति असन्तुष्टि रहेको बताइन्छ । यस्तो प्रक्रिया लामो समयसम्म नचल्ने उल्लेख गर्दै तोकिएको जिम्मेवारी पूरा नगर्ने कर्मचारीलाई जिम्मेवार बनाउन निर्देशन दिएका हुन् ।
साना जलविद्युत् आयोजनाको मर्मत सम्भार, सौर्य परियोजना तथा केन्द्रको कार्यक्षेत्रभित्र पर्ने अधिकांश परियोजनाको प्रगति न्यून छ । पटक–पटक निर्देशन दिँदासमेत केन्द्रले जिम्मेवारपूर्ण तरिकाले काम गर्न नसकेको भन्दै मन्त्री बस्नेतले अब धेरै दिन छुट दिन नसकिने बताए ।
बैठकमा कार्यकारी निर्देशक ढकालले सबै काम प्रक्रियामा नै रहेको बताएका थिए । ऊर्जा, जलस्रोत तथा सिँचाइ मन्त्रालयका सचिव गोपाल सिग्देलले पनि केन्द्रको कार्यशैलीप्रति आपत्ति प्रकट गरेको मन्त्रालयले जनाएको छ ।
नेपाल विद्युत् प्राधिकरणको केन्द्रीय प्रसारण प्रणाली नपुगेका स्थानमा वैकल्पिक ऊर्जामार्फत उज्यालो पु¥याउने लक्ष्य राखिएको छ । केन्द्रका अधिकांश गतिविधि गैरसरकारी संस्था केन्द्रित भएको आरोप लाग्दै आएको छ । तोकिएको जिम्मेवारी पूरा नगर्ने अधिकारीलाई विभागीय कारबाही गर्ने चेतावनी समेत बैठकले दिएको छ
