- खगेन्द्र फुयाल
केहीदिन अघि लाजले पनि सर्माउनेगरी प्रहरी कर्मचारी र निजामती कर्मचारीबीेच कुटाकुटको भिडियो सामाजिक सञ्जालमा छरपस्ट भयो । त्रिभुवन विमानस्थल परिसरमा अध्यागमन कार्यालयका निजामती कर्मचारी र प्रहरी कर्मचारीबीच हात हालाहाल भएको भिडियो भाइरल भएपछि उक्त घटना सर्वत्र चर्चा र चासोको विषय बनिरहेको छ ।
भाइरल भएको उक्त भिडियोमा दुई भिन्न क्षेत्रका महत्वपूर्ण जिम्मेवारी वहन गर्ने सरकारी कर्मचारीबीच भएको तनाव उत्कर्षमा पुग्दा एउटा निकायको कर्मचारीको समुहले अर्को निकायको कर्मचारीमाथि कुटपिट गरेको जोकोहीले मज्जाले देख्नसक्छ ।
जनताको सेवा सहित देशहितमा समर्पित निजामती कर्मचारी र देश र जनताको शान्ति सुरक्षा कायमगर्ने कसम खाएर जनताले तिरेको करबाट पारिश्रमिक बुझ्ने दुई भिन्न निकायका सरकारी कर्मचारीबीच कार्यक्षेत्रमा हात हालाहाल भएको घटनाले देशको प्रशासनिक तथा कर्मचारीतन्त्रको अनुशासन यथार्थ प्रतिबिम्बित गरेको छ । पदयीय जिम्मेवारी भुलेर व्यक्तिगत फाईदाकालागि सार्वजनिक सेवा कसरी हावी हुदैछ भन्ने यो घटना अध्ययनको विषय बन्न सक्छ । निष्पक्ष छानबिन गर्ने हो भने यो घटनाको गहिराइमा पक्कैपनि केही तथ्य भेटिन्छ ।
यस घटनाले देशको कानुनी शासनलाई नै चुनौति दिएको छ । एक संवेदनशिल क्षेत्रमा दुई जिम्मेवार निकायका कर्मचारीले देखाएको अवाञ्छित गतिविधिले अराजकताको पराकाष्ट नागेको प्रष्ट छ ।
अघिपछि पनि उक्त क्षेत्रमा प्रहरी र अध्यागमनका कर्मचारीबीच बेलाबेलामा तनाव उत्पन्न भएका समाचार बाहिर नआएका हैनन् । तर, कारबाही भएको कहीकतै सुनिएन ।
भिजिट भिसा र नक्कली श्रम स्वीकृतिमा खाडी मुलुक लगायत यूरोपका विभिन्न देशमा पठाउने क्रममा कर्मचारीबीचमा चलखेल हुनेगरेको समाचार बेलाबखत आइरहन्छ । सुन तस्करी लगायतका विषयमा कमिसनको लहरो अध्यागमनका कर्मचारीदेख प्रहरीका खल्तीसम्म पुग्नेगरेको तथ्य पक्राउ परेकाहरुले वयानका क्रममा दिएका छन् ।
माघ १० गतेदेखि सरकारले भिजिट भिसामा विदेश जानेहरुको लागि नयाँ नियम लागु गरेको छ । यो घटनाले कर्मचारीबीच कतै कमिसन नमिलेर पो उनिहरुबीच विवाद सृजना गरेको होकि भन्ने शंका गर्ने ठाउ पनि थपिदिएको छ ।
उक्त घटनापछि शनिबार अध्यागमनका कर्मचारीले कालोपट्टी बाँधेर कार्यक्षेत्रमा खटिएको जनाइएको छ । त्यस्तै कर्मचारी संगठनहरुले एयरपोर्ट तथा अध्यागमन सुरक्षाको जिम्मा शसस्त्र प्रहरीलाई दिनुपर्ने भन्दै सरकारसँग माग गरेका छन् । नक्कली भिजिट भिसामा कर्मचारीको गडबडी र त्यसपछिको घटनाक्रमले पनि उनिहरुबीचमा तिक्तता बढेको पक्कै छ ।
कर्मचारीप्रति नरम भनिएका प्रधानमन्त्री पुष्पकमल दाहाल तेस्रो कार्यकालका लागि प्रधानमन्त्री भएको माघ १० गते तेह्महिना पुरा भएको छ । जनहित र सुशासनको क्षेत्रमा जनताले अनुभव गर्नेगरी कामगर्न आफु यसपटक प्रधानमन्त्री भएको पटकपटक दोहोर्याउने प्रधानमन्त्री प्रचण्ड कर्मचारीको कार्यशैलीप्रति आफै पनि सन्तुष्ट छैनन ।
जनताको नजरमा सरकारका निकाय भ्रष्टचारका अखडामा रुपान्तरण भएका छन् भन्ने जस्ता भाष्य परिवर्तन गर्न आवश्यक छ । सरकारको आस्वासन जनताले सुन्न छोडेका छन् । यसै सेरोफेरोमा दुई जिम्मेवार निकायका कर्मचारीबीच संवेदनशिल क्षेत्रमा भएको घटनाले सरकारप्रतिको विश्वास झन घटेको छ ।
यो घटनालाई सरकारले गम्भीर चासोका साथ अनुसन्धान नगर्ने हो भने यसले खुल्लमखुल्ला अराजकता मच्चाउने पक्का छ । पदीय दुरुपयोग, कमिशनखोर दलालीमार्फत कानुनी राज्यको धज्जी उडाउनेहरुको मनोबल बढ्ने पक्का छ ।
सरकारप्रति गुमेको जनविस्वास पुनस्थापना गर्न साथै पदीय दुरुपयोगको अन्त्य तथा राजस्व छली लगायतका घटना रोक्न पनि सरकारले यस घटनालाई गम्भीर अध्ययन गरी दोषीमाथि हदैसम्मको कारबाही आवश्यक छ । कानुनले निर्देश गरेको क्षेत्रका आधारमा विधागत जिम्मेवारी तोक्ने र पदीय दुरुपयोग गर्नेमाथि बिना हिचकिच विभागीय कारबाही गर्न सरकारले विलम्ब गर्नुहुदैन ।
