(सिन्धुलीबाट बलराम अधिकारीको सहयोगमा)
सिन्धुली । सिन्धुलीका कृषकलाई कृषक चौतारी मार्फत आफुले उत्पादन गरेको तरकारी तथा फलफुल बिक्री गर्न कृषि बजार सिन्धुलीले आह्वान गरेको छ ।
कमलामाई नगरपालिका वडा नं. ६ कृषि बजार सिन्धुलीमा रहेका सटरहरु मध्ये २ वटा सटरलाई कृषक चौतारी भनेर नामाकरण गरि कृषकले उत्पादन गरेका ताजा तरकारी तथा फलफुल विक्रीको लागी निशुल्क उपलब्ध गराइएकाे कृषि बजार व्यवस्थापन समितिका सदस्य श्रीचन चौधरीले बताए ।
वास्तविक किसान प्रत्यक्ष मारमा नपरोस् भनी कृषि वजार व्यवस्थापन समिति सिन्धुलीले २ (दुई) वटा सटर (कोठा) कृषकलाई निशुल्क तरकारी फलफुल विक्री गर्न व्यवस्था गरेपनि कोठामा आएर व्यापार गर्ने कृषक भने नआएको कृषि वजार व्यवस्थापन समिति अध्यक्ष श्री प्रयागराज खतिवडाले जानकारी दिएका छन् ।
विशेषगरी कमलामाई नगरपालिका, मरिण गाउँपालिका, गोलञ्जोर गाउँपालिका, घ्याङ्लेख गाउँपालिका, हरिहरपुरगढी गाउँपालिका र तिनपाटन गाउँपालिका वाट विगतको वर्षमा मौसम अनुसारको तरकारी वजार विक्रीको लागि कृषकले ल्याउने गरेपनि हाल भने कृषकहरु आफुले उत्पादन गरेको तरकारी व्यापारीलाई घरवाटै उठाउने गरेकाकारण सटर खाली रहेको बताइन्छ ।
वास्तविक कृषक र व्यापारीमार्फत विक्रीहुने कृषी उपजको मुल्यमा धेरै फरक हुने गरेको र उक्त अन्तरलाई घटाई उपभोक्तामाझ सिधै पुग्ने उदेश्यका साथ कुषक चौतारीको परिकल्पना गरिएको अध्यक्ष खतिवडाले बताए ।
कृषकहरुलाई वजार सुनिश्चितताको बोध गरि व्यवसायप्रति थप प्रेरणा मिलोस् भनी कृषक चौतारीका सटर निशुल्क उपलब्ध गराइएको भन्दै उपभोग गर्न कृषकहरुलाई समितिका अध्यक्ष खतिवडाले आग्रह गरे ।
