काठमाडौँ। नबिल बैंक लिमिटेडले ग्राहकहरूको डिजिटल बैंकिङ अनुभवलाई थप सहज, सुरक्षित र आधुनिक बनाउने उद्देश्यले ‘नबिल भर्चुअल क्रेडिट कार्ड’ सञ्चालनमा ल्याएको छ। यही असोज २९ गते बिहीबारदेखि सुरु भएको यो सेवा बैंकको एनबैंक (nBank) एपमार्फत सहजै प्राप्त तथा प्रयोग गर्न सकिनेछ।
बैंकका अनुसार अब ग्राहकहरूले परम्परागत क्रेडिट कार्डका लागि गर्नुपर्ने कागजी प्रक्रिया तथा अन्य formal झन्झटहरू पूरा गर्नु नपर्ने भएको छ। बैंकले आफ्नै डेटामा आधारित विश्लेषणात्मक प्रणालीमार्फत योग्य ग्राहकहरूलाई पूर्व–स्वीकृत (pre-approved) गरिसकेको छ। योग्य ग्राहकहरूले एनबैंक एपको होमपेजमा रहेको ‘अपलाइ नाउ’ (Apply Now) अप्सनमार्फत आवेदन दिएर तुरुन्तै भर्चुअल क्रेडिट कार्ड प्राप्त गर्न सक्नेछन्।
पूर्ण रूपमा डिजिटल स्वरूपमा उपलब्ध यस कार्डमार्फत ग्राहकहरूले फोनपे (Fonepay) मर्चेन्ट क्यूआर कोड स्क्यान गरी दैनिक डिजिटल कारोबारहरू सुरक्षित र सहज रूपमा गर्न सक्नेछन्।
यस सेवाको सञ्चालनका लागि नबिल बैंक लिमिटेड र फोनपे पेमेन्ट सर्भिस लिमिटेडबीच बुधबार समझदारीपत्रमा हस्ताक्षर (MoU) भएको थियो।
कार्यक्रमलाई सम्बोधन गर्दै नबिल बैंकका प्रमुख कार्यकारी अधिकृत (CEO) मनोज कुमार ज्ञवालीले बैंकको नवप्रवर्तन र ग्राहक-केन्द्रित बैंकिङ समाधानप्रतिको प्रतिबद्धता दोहोर्याउनुभयो। सिइओ ज्ञवालीले भन्नुभयो, “ग्राहकको सहजता नै हाम्रो प्राथमिकता हो। डिजिटल युगको आवश्यकता अनुरूप ग्राहकलाई सकेसम्म बैंक शाखामै पुग्न नपरी बैंकिङ सेवा उपलब्ध गराउने दिशामा हामी निरन्तर काम गरिरहेका छौं। नबिल भर्चुअल क्रेडिट कार्ड सोही प्रयासको एक महत्वपूर्ण हिस्सा हो।”
चार दशकदेखि गुणस्तरीय बैंकिङ सेवा प्रदान गर्दै आएको नबिल बैंकले हाल देशभर २६२ शाखा सञ्जाल र ३१६ एटिएममार्फत २८ लाखभन्दा बढी ग्राहकहरूलाई सेवा प्रदान गर्दै आएको छ। बैंकले पछिल्लो समय दिगो र प्रविधिमैत्री बैंकिङलाई प्राथमिकता दिँदै डिजिटल रूपान्तरणलाई तीव्र रूपमा अघि बढाएको छ।
