काठमाडौँ, २४ आश्विन, नेपाली मौलिक खाना, रैथाने स्वाद र समृद्ध आतिथ्य संस्कृतिको प्रवर्द्धन तथा ब्रान्डिङ गर्ने लक्ष्यका साथ प्रेसिडेन्ट बिजनेस ग्रुपले ‘तेस्रो पक्कु फेस्टिभल–२०८३’ आयोजना गर्ने भएको छ। आगामी आश्विन २५ गतेदेखि २९ गतेसम्म पाँच दिनसम्म उपत्यकाका विभिन्न स्थानका साथै भैरहवामा भव्य रूपमा महोत्सव सञ्चालन गरिने होटल प्रेसिडेन्ट बिजनेस ग्रुप सञ्चालक तथा काठमाडौं जिल्ला होटल व्यवसायी सघंका अध्यक्ष शंकर भण्डारीले आज एक पत्रकार सम्मेलनको आयोजना गरि जानकारी गराउनु भयो ।
वहाँका अनुसार पुस्तौँदेखि नेपाली सामाजिक तथा सांस्कृतिक जीवनसँग जोडिँदै आएको परम्परागत परिकार ‘पक्कु’लाई नयाँ पुस्ता, स्वदेशी-विदेशी पर्यटक र अन्तर्राष्ट्रिय बजारसम्म पुर्याउने उद्देश्यले विगत तीन वर्षदेखि यो फेस्टिभल निरन्तर सञ्चालन भइरहेको छ।
यस वर्षको महोत्सवमा काठमाडौँका सुन्धारा, महाराजगञ्ज, बत्तीसपुतली र कलंकीस्थित प्रेसिडेन्ट बिजनेस ग्रुपका आउटलेटहरूमा पक्कुको मौलिक स्वाद, परम्परागत पाकविधि र विशिष्ट आतिथ्यता प्रस्तुत गरिनेछ।
काठमाडौँका साथै लुम्बिनी प्रदेशमा पनि रैथाने स्वाद फैलाउन भैरहवामा आयोजना हुने फुड फेस्टिभलमा समेत प्रेसिडेन्टको पक्कु विशेष रूपमा प्रस्तुत गरिनेछ। यसले नेपाली खानालाई फरक भूगोल, संस्कृति र पर्यटकीय गन्तव्यहरूसँग जोड्दै पहिचान व्यापक बनाउन सहयोग पुर्याउनेछ।
प्रेसिडेन्ट बिजनेस ग्रुपका अनुसार पक्कु फेस्टिभल केवल अल्पकालीन खाद्य उत्सव वा व्यापारिक गतिविधि मात्र नभई नेपाली खानालाई पर्यटनसँग जोड्ने दीर्घकालीन अभियान हो।
नेपालको पर्यटन प्राकृतिक सौन्दर्य र सांस्कृतिक सम्पदामा मात्र सीमित नभई यहाँको पाककला, स्वाद र आतिथ्य परम्परामा आधारित छ। रैथाने खानाको व्यावसायिक प्रवर्द्धनले:
- स्थानीय कृषि उत्पादन तथा पशुपालनमा माग बढाउँछ।
- आपूर्ति शृङ्खला र स्थानीय उद्यमशीलतालाई गति दिन्छ।
- भान्सामा कार्यरत दक्ष जनशक्ति तथा श्रमिकहरूका लागि रोजगारी सिर्जना गर्छ।
हाल प्रेसिडेन्ट बिजनेस ग्रुपअन्तर्गतका आउटलेटहरूमा ३५० भन्दा बढीले प्रत्यक्ष रोजगारी पाइरहेका छन्आगामी योजना र व्यावसायिक विस्तार
दुई दशकदेखि होटल तथा रेस्टुरेन्ट क्षेत्रमा निरन्तर सक्रिय रहँदै आएको प्रेसिडेन्ट बिजनेस ग्रुपले ‘स्वाद, स्वास्थ्य र आतिथ्यता सँगसँगै’ भन्ने मूल मान्यतालाई आत्मसात् गर्दै आएको छ।
आगामी दिनमा आफ्नो व्यावसायिक सञ्जाल विस्तार गर्दै रुपन्देहीको बुटवल र काठमाडौँको बुढानीलकण्ठबाट नयाँ आउटलेटहरू सञ्चालनमा ल्याउने समूहको योजना रहेको छ।
प्रेसिडेन्ट बिजनेस ग्रुपले नेपाली मौलिक स्वादको संरक्षण, गुणस्तरीय सेवा र व्यावसायिक मापदण्डलाई कायम राख्दै ‘स्थानीय स्वादलाई राष्ट्रिय पहिचान र राष्ट्रिय स्वादलाई विश्व बजारसम्म’ पुर्याउने दूरदृष्टिका साथ सम्पूर्ण ग्राहक, सञ्चारकर्मी तथा स्वादका पारखीहरूलाई महोत्सवमा सहभागी हुन हार्दिक आह्वान गरेको छ।
